वीरगन्ज – सडन ढेथमा आयोजक भेट्रान्स सिटी क्लबलाई पराजित गर्दै नेपाल पुलिस क्लब प्रथम वीरगन्ज गोल्डकपको फाइनलमा पुगेको छ । बुधबार भएको पहिलो समीफाइनल खेलको निर्धारित समयमा कुनै पनि टीमले गोल गर्न सकेका थिएनन् । कडा प्रतिस्पर्धाका बीच दुबै टीमले गोल गर्ने अवसर पाएपनि त्यसलाई गोलमा परिणत गर्न भने सकेनन् ।

पेनाल्टी सुट आउट पनि बराबरीमा टुंगीएको थियो । पेनाल्टीमा दुबैले ३/३ गोल गरेका थिए । त्यसपछि सडन ढेथमा नेपाल पुलिस क्लबले १–२ ले भेट्रान्स सिटी क्लबलाई पराजित गरेको हो ।  सडन डेथमा नेपाल पुलिस क्लबका हेमन्त श्रेष्ठ र विवेक सन्तोषीले एक/एक गोल गरे । सिटी क्लबका मुसाले एक गोल गरेपनि राजन चौधरीले सडन ढेथमा प्रहार गरेको पेनाल्टी पुलिसका गोलकिपरले छेकेका थिए ।

पुलिस क्लबका उज्वल राई, प्रताप गुरुङ, पृथवी चौधरीले पेनाल्टी सुट आउटमा गोल गरेका थिए भने सिटी क्लबका अबि लामा, सुजल डगोंल र राजु नगरकोटीले गोल गरेका थिए ।  नेपाल पुलिस क्लबका गोलकिपर शत्रुधन चौधरी म्यान अफ दिन म्याच घोषित भएका थिए । चौधरीलाई आयोजक क्लबका महासचिव पंकज श्रेष्ठले नगद १० हजार रुपैया“ पुरस्कार प्रदान गरेका थिए ।

त्रिभुवन आर्मी फुटबल क्लब र संकटा फुटबल क्लबबीच बिहीबार दोस्रो सेमिफाइनल खेलिने छ । गत कात्तिक १८ देखि सुरु भएको प्रथम वीरगनज गोल्डकपको फाइनल खेल शनिबार खेलिने छ ।  वीरगन्ज महानगरपालिका मूख्य प्रायोजक रहेको प्रथम वीरगन्ज गोल्डकपको विजयी टोलीले ११ लाख ११ हजार ११ सय रुपैया र उपविजेताले ५ लाख ५५ हजार ५ सय रुपैया पुरस्कार राशी पाउने छन् । वीरगन्जको आदर्शनगर रंशालामा दर्शकका लागि अस्थायी प्यारफिट निर्माण गरिएको छ ।