वीरगन्ज । भोटेकोशी र त्रिशूली नदीमा आएको विनाशकारी बाढीबाट प्रभावित रसुवाका नागरिकका लागि वीरगन्जबाट करिब १५ लाख रुपैयाँ बराबरको राहत सामग्री पठाइएको छ।

राष्ट्रिय स्वतन्त्र पार्टी (रास्वपा)का महाधिवेशन प्रतिनिधि सुधिर पटेलको नेतृत्वमा युवा नेताहरूको टोली शनिबार राहत सामग्री लिएर रसुवातर्फ प्रस्थान गरेको हो। ‘वीरगन्ज सहयोगी हात’ नामक युवाहरूको पहलमा संकलन गरिएको खाद्यान्न तथा अन्य आवश्यक सामग्री पिकअप गाडीमार्फत रसुवा पठाइएको हो।

राहत सामग्री लिएर आफू स्वयं प्रभावित क्षेत्रमा पुग्न लागेको पटेलले बताए। उनका अनुसार रसुवा पुगेपछि विभिन्न होल्डिङ सेन्टरमा रहेका बाढीपीडितलाई राहत सामग्री वितरण गरिनेछ।

सम्भव भएसम्म बाढी प्रभावित नागरिकका घरघरमै पुगेर समेत राहत सामग्री उपलब्ध गराउने योजना रहेको पटेलले जानकारी दिए।

बाढीका कारण भोटेकोशी र त्रिशूली नदी आसपासका विभिन्न क्षेत्रमा ठूलो क्षति पुगेपछि प्रभावित नागरिकलाई तत्काल आवश्यक खाद्यान्न तथा अन्य सामग्री उपलब्ध गराउने उद्देश्यले वीरगन्जबाट राहत संकलन गरिएको हो।