वीरगञ्ज । वीरगञ्ज भन्सार कार्यालयले चालु आर्थिक वर्ष २०८१/८२ को पहिलो महिना साउनमा १८ अर्ब ३९ करोड ६७ लाख रुपैयाँ राजस्व संकलन गरेको छ।

गत साउन १ गतेदेखि वीरगञ्ज भन्सार कार्यालय र सुक्खा बन्दरगाह भन्सार कार्यालय गाभिएर एउटै कार्यालयमार्फत सेवा प्रवाह गर्न थालेपछि सो राजस्व संकलन भएको हो।

कार्यालयका अनुसार चालु आवको साउन महिनामा तोकिएको लक्ष्यको ८७ दशमलव ६८ प्रतिशत राजस्व मात्र संकलन भएको छ। भन्सार विभागले साउन महिनाको लागि २० अर्ब ९८ करोड २१ लाख राजस्व संकलन गर्ने लक्ष्य तोकेको थियो।

गत आर्थिक वर्षको साउन महिनामा भने वीरगञ्ज भन्सार कार्यालयले १५ अर्ब ९२ करोड रुपैयाँ राजस्व संकलन गरेको थियो। यसपटकको संकलन विगतको तुलनामा उल्लेखनीय मात्रामा बढी रहेको कार्यालयका प्रमुख भन्सार प्रशासक दीपक लामिछानेले जानकारी दिए।

भन्सार विभागले वीरगञ्ज भन्सार कार्यालयलाई चालु आर्थिक वर्ष २०८१/८२ का लागि कुल दुई खर्ब ७३ अर्ब ३९ करोड ४८ लाख रुपैयाँ राजस्व संकलन गर्ने वार्षिक लक्ष्य तोकेको छ।