मिर्गौला उपचारमा स्वस्थ आहारको पनि महत्त्वपूर्ण भूमिका हुन्छ । स्वस्थ आहारले मिर्गौलालाई थप क्षतिबाट जोगाउन मद्दत गर्नुका साथै उच्च रक्तचाप र मधुमेह जस्ता सम्बन्धित समस्यालाई पनि नियन्त्रण गर्न मद्दत गर्छ ।

क्रोनिक मिर्गौला रोग यस्तो अवस्था हो, जसमा मिर्गौलाले राम्रोसँग काम गर्दैन । यसले शरीरमा विषाक्त पदार्थ र तरल पदार्थको निर्माणका साथै अन्य धेरै समस्या निम्त्याउन सक्छ । मधुमेह, उच्च रक्तचाप,  मिर्गौला रोगको पारिवारिक इतिहास र विभिन्न संक्रमण मिर्गौलाको समस्या निम्तिने कारण हुन् ।

मिर्गौला रोगीलाई डाइट चार्ट चाहिन्छ ?

मिर्गौलाको समस्या भएका व्यक्तिले आफ्नो खाने बानीमा धेरै ख्याल गर्नुपर्छ, किनभने यसले उनीहरूको स्वास्थ्यमा ठूलो असर पार्न सक्छ । त्यसैले उनीहरूले निश्चित डाइट चार्ट फलो गर्नु फाइदाजनक हुन्छ । यसले मिर्गौलाको स्वास्थ्यका लागि फाइदाजनक खानेकुरा र खान नहुने खानेकुराका बारेमा जानकारी दिन्छ ।

साथै डाइट चार्टले मिर्गौलामा धेरै तनाव नदिई आवश्यक पोषण प्राप्त गर्न खानाको प्रकार मात्राबारे जानकारी दिन्छ ।

डाइट चार्टले के खाने र कति खाने भन्ने निर्देश गर्छ । आवश्यक पोषक तत्त्वहरू प्राप्त गरियो भने थप जटिलताबाट बच्न सकिन्छ । मिर्गौलाको समस्या भएका व्यक्तिको डाइट चार्टमा प्रोटिन, पोटासियम, फस्फोरस,  सोडियममा कम र भिटामिन बी ६ र बी १२ बायोटिन प्रशस्त हुनुपर्छ ।

प्रोटिन सेवन

मिर्गौलाको समस्या भएका व्यक्तिले प्रोटिनको सेवनमा सावधानी अपनाउनुपर्छ, किनभने यसले मिर्गौलामा दबाब दिन्छ । उच्च-प्रोटिन आहारहरूले इन्ट्राग्लोमेरुलर दबाब बढाउन सक्छ, जसले मिर्गौलाको समस्या बढाउन सक्छ । कम प्रोटिन डाइट चार्टमा माछा, टोफु, कुखुराको मासु र सिमी जस्ता कम प्रोटिन आहार समावेश गर्नुपर्छ ।

तरल पदार्थको सेवन

हाइड्रेटेड रहनु एकदमै महत्वपूर्ण हुन्छ । तर मिर्गौलाको समस्यामा तरल पदार्थको प्रकार र मात्रामा ध्यान दिन आवश्यक हुन्छ, किनकि धेरै तरल पदार्थ पिउनाले शरीर सुन्निने र समस्या निम्तिन सक्छ । दैनिक कति तरल पदार्थ पिउनुपर्छ भन्नेबारे डाक्टरसँग सल्लाह गर्नु राम्रो हुन्छ ।

पोटासियम सेवन

मिर्गौला रोगीले पोटासियमको सेवन सीमित गर्नुपर्छ । किनभने यसले उच्च रक्तचाप निम्त्याउन सक्छ । क्रोनिक मिर्गौलाको समस्या भएका व्यक्तिले पोटासियमको उच्च मात्रा प्रशोधन गर्न सक्षम हुँदैनन् । यसले रगतमा पोटासियमको स्तर उच्च हुनसक्छ । मिर्गौला समस्याको आहार चार्टमा पोटासियम कम हुने खाना जस्तै टमाटर, गाजर र स्याउ समावेश गर्न सकिन्छ ।

फस्फोरस सेवन

मिर्गौलाको समस्यामा फस्फोरसको सेवन सीमित मात्रामा गर्नु राम्रो हुन्छ । किनकि यसले क्याल्सियम कम हुनसक्छ र शरीरले अतिरिक्त फस्फोरस प्रक्रिया गर्न सक्षम नहुन सक्छ । आहार तालिकामा फस्फोरस कम भएका खानेकुरा जस्तै दूध, चीज र दही समावेश गर्नुपर्छ ।

सोडियम सेवन

यो समस्यामा सोडियम सेवन सीमित हुनुपर्छ । किनभने यसले तरल पदार्थ जम्मा गर्ने र उच्च रक्तचाप निम्त्याउन सक्छ, जुन बिरामीका लागि हानिकारक हुनसक्छ । त्यसैले सोडियमको मात्रा १ हजार ५०० मिलिग्राम प्रतिदिनमा सीमित गर्नुपर्छ । ताजा फलफूल र तरकारीहरू जस्ता सोडियम कम भएका खाना छनोट गर्नुपर्छ ।

भिटामिन र खनिज

भिटामिन र खनिज भने मिर्गौलाको समस्या भएकाका लागि आवश्यक हुन्छ । किनकि तिनीहरूले प्रतिरक्षा प्रणालीलाई बढावा दिन र समग्र स्वास्थ्य कायम राख्न मद्दत गर्छ । पर्याप्त मात्रामा भिटामिन जस्तै बी १, बी २, बी ६, बी १२, फोलिक एसिड र केही भिटामिन सीयुक्त खानेकुरा खानुपर्छ ।

मिर्गौलाको समस्या भएका व्यक्तिको डाइट चार्टमा प्रोटिनको मात्रा मध्यम हुनुपर्छ । प्रशस्त मात्रामा ताजा फलफूल र तरकारीहरू समावेश गर्नुपर्छ । सोडियमको मात्रा कम गर्नुपर्छ । प्रशोधित र उच्च बोसोयुक्त खानेकुराहरू पनि कम हुनुपर्छ ।