वीरगन्ज – पोखरा निवासी एक युवकलाई पर्सा प्रहरीले ठूलो परिमाणमा लागू औषध सहित पक्राउ गरेको छ । वीरगन्ज महानगरपालिका– २१ परवानीपुरमा वीरगन्ज बाट हेटौडातर्फ गइरहेको ग.१.ख ९६२६ नम्बरको यात्रुवाहक बसको खनतलासी गर्दा प्रहरीले ९ सय एम्पुल लागूऔषध बरामद गरेको हो ।
प्रहरी चौकी परवानीपुरबाट खटिएको टोलीले उक्त यात्रुवाहक बसको खनतलासी गर्दा चालक बस्ने सिटमुनी लुकाई छिपाई राखिएको सेतो झोलामा कालो प्लाष्टिक भित्र पत्रिकामा सेतो टेपले बेरि राखिएको अवस्थामा ३ सय एम्पुल फेनारगन, ३ सय एम्पुल डाईजेपाम र ३ सय एम्पुल नुरफिन गरि ९ सय एम्पुल लागूऔषध बरामद भएको प्रहरी नायब उपरीक्षक कुमार विक्रम थापाले बताए ।
पक्राउ पर्नेमा कास्कीको पोखरा महानगरपालिका ६ निवासी ४० वर्षीय रबिन्द्र केसी रहेको थापाले बताए । प्रहरीका अनुसार केसीले चालकको सिटमुनि लागूऔषधको झोला लुकाएका थिए । थापालाई नियन्त्रणमा लिई लागू औषध सम्बन्धी कसूरमा थप अनुसन्धान थालिएको छ ।