काठमाडौँ । नेपाल प्रिमियर लिग (एनपिएल)–२०२५ आजबाट सुरु हुँदैछ । प्रतियोगिताको उद्घाटन खेल साविक विजेता जनकपुर बोल्ट्स र काठमाडौंँ गोर्खाजबीच कीर्तिपुरस्थित अन्तर्राष्ट्रिय त्रिवि क्रिकेट मैदानमा साँझ ४ बजेबाट हुने तय भएको छ।

पहिलो संस्करणमा जनकपुरले काठमाडौंँलाई सहजै पराजित गरेको थियो। यसपटक पनि जित दोहोर्याउने लक्ष्यसहित जनकपुर मैदानमा उत्रन लागेको छ भने अघिल्लो हारको बदला लिन काठमाडौंँ गोर्खाज पनि उत्तिकै तयारीसाथ प्रतिस्पर्धामा उत्रँदैछ।

जनकपुर बोल्ट्स : नयाँ प्रशिक्षण सेटअप, बलियो विदेशी लाइनअप

पहिलो संस्करणमा पुबुदु दासानायकेको प्रशिक्षणमा खेलेको जनकपुर यसपालि वेस्ट इन्डिजका प्रशिक्षक शिवनारायण चन्द्रपालको नेतृत्वमा मैदानमा उत्रनेछ।
दक्षिण अफ्रिकाका अनुभवी स्पिनर इमरान ताहिर र अलराउन्डर वायने पार्नेल जनकपुरका प्रमुख आकर्षण हुन्। यी दुवै खेलाडीले अन्तर्राष्ट्रिय स्तरमा दक्षिण अफ्रिकाको लामो समयसम्म प्रतिनिधित्व गरिसकेका छन्।

पहिलो संस्करणमा उत्कृष्ट प्रदर्शन गरेका लाहिरु मिलान्थालाई जनकपुरले फेरि निरन्तरता दिएको छ। अमेरिकी खेलाडी सञ्जय कृष्णमुर्ती र नामिबियाका निकोल लोफ्टी इटोन पनि जनकपुरको टोलीमा रहेका छन्। गत वर्ष जनकपुरका प्रमुख विदेशी स्टार जिम्मी निसम भने यसपटक सहभागी हुने छैनन्।

यस संस्करणमा जनकपुरको टोलीमा मार्की खेलाडी आसिफ शेखसहित अनिलकुमार साह, ललित नारायण राजवंशी, किशोर महतो, रुपेश सिंह, मयन यादव, आदित्य महता, विकास अग्री, सचिन भट्ट, तुलबहादुर थापा र अन्य समावेश छन्।

काठमाडौंँ गोर्खाज : मोन्टी देसाईको रणनीतिमा बलियो टिम

काठमाडौंँ गोर्खाजले यस संस्करणका लागि भारतका मोन्टी देसाईलाई मुख्य प्रशिक्षक नियुक्त गरेको छ। देसाई नेपाली राष्ट्रिय टोलीका पूर्व मुख्य प्रशिक्षकसमेत हुन्।

विदेशी खेलाडीको कोटा सबैभन्दा पहिले पूरा गर्ने टोली काठमाडौंँ हो। टीमले पहिलो अनुबन्ध दक्षिण अफ्रिकाका विकेटकिपर–ब्याटर रिकार्डो भास्कोनेसेलोससँग गरेको थियो। त्यसपछि स्कटल्यान्डका जेरहार्ड इरस्मससँग सम्झौता नवीकरण गर्दै अन्य विदेशीका रूपमा अमेरिकी अलराउन्डर मिलिन्द कुमार, भारतीय मूलका अमेरिकी सन्नी पटेल, तथा इंग्ल्यान्डका बेन चाल्र्सवर्थ र जोन सिम्पसनलाई समावेश गरेको छ।

काठमाडौंँको मार्की खेलाडी करण केसी यसपटक पनि टोलीको नेतृत्व भूमिकामा देखिँदैछन्। साथै भीम सार्की, शाहव आलम, रशिद खान, दीपेश कँडेल, प्रतिक श्रेष्ठलाई निरन्तरता दिइएको छ। मिनी अक्सनमार्फत मोहम्मद आदिल आलम अन्सारी, सन्तोष यादव, आकाश त्रिपाठी, उत्तम थापामगर र तुलबहादुर थापा गोर्खाजमा भित्रिएका छन्।

आजको खेलले दिनेछ प्रतिस्पर्धाको संकेत

दुवै टोलीले विदेशी र स्थानीय दुवै वर्गका खेलाडीहरू सन्तुलित रूपमा समावेश गरेका छन्। पहिलो संस्करणको रेम्याच मानिएको आजको खेलले यस संस्करणको प्रतिस्पर्धात्मक स्तर कति कडा हुनेछ भन्ने संकेत दिनेछ।

एनपिएलको दोस्रो संस्करण आजको रोमाञ्चक भिडन्तसँगै औपचारिक रूपमा सुरु हुँदैछ।