वीरगञ्ज । वीरगञ्ज महानगरपालिकाका मेयर पदका प्रत्याशी तथा राष्ट्रिय स्वतन्त्र पार्टी (रास्वपा) का महाधिवेशन प्रतिनिधि सुधीर पटेलले जनतासँग प्रत्यक्ष भेटघाट, संवाद तथा अन्तरक्रियालाई निरन्तरता दिएका छन्।

यसैक्रममा पटेलले वीरगञ्ज महानगरपालिका–२७ स्थित कुहडीमा स्थानीय जनसमुदायसँग भेटघाट तथा छलफल गरेका छन्। दीपावली तथा छठ पर्वको अवसरमा स्थानीयवासीसँग शुभकामना आदानप्रदान गर्दै उनले स्थानीयका समस्या, गुनासा, आवश्यकता तथा सुझावबारे छलफल गरेका हुन्।

भेटघाटका क्रममा स्थानीय बासिन्दाले आफ्नो टोल तथा वडामा रहेका विभिन्न समस्या र विकास निर्माणसँग सम्बन्धित विषयहरू उठाएका थिए। स्थानीयवासीका गुनासा तथा सुझावलाई पटेलले गम्भीरतापूर्वक सुन्दै उनीहरूका वास्तविक आवश्यकता र अपेक्षा बुझ्ने प्रयास गरेका थिए।

सो अवसरमा पटेलले जनतासँग प्रत्यक्ष भेटघाट र संवाद गर्नु स्थानीय समस्या पहिचान गर्ने महत्वपूर्ण माध्यम भएको बताए। जनताको आवाज, सुझाव र अपेक्षालाई प्राथमिकतामा राखेर अघि बढ्नुपर्ने उनको धारणा थियो।

उनले चाडपर्वले समाजमा आपसी सद्भाव, एकता, भाइचारा तथा सामाजिक सम्बन्धलाई थप मजबुत बनाउने विश्वास व्यक्त गर्दै दीपावली तथा छठ पर्वले सबैको जीवनमा सुख, शान्ति, समृद्धि र सकारात्मक ऊर्जा ल्याओस् भन्ने शुभकामना व्यक्त गरे।

स्थानीयस्तरमा जनतासँग निरन्तर संवाद गर्दै उनीहरूका समस्या तथा सुझाव संकलन गर्ने उद्देश्यले आफूले भेटघाट कार्यक्रमलाई निरन्तरता दिँदै आएको पटेलले बताए।

स्थानीय जनसमुदायसँगको प्रत्यक्ष भेटघाटले जनप्रतिनिधि र नागरिकबीचको सम्बन्धलाई थप सुदृढ बनाउनुका साथै स्थानीय आवश्यकता, समस्या तथा विकासका सवाललाई नजिकबाट बुझ्न सहयोग पुग्ने विश्वास गरिएको छ।