प्रकाश तिवारी
वीरगञ्ज । वीरगञ्जको क्रिकेट मैदानमा सम्पन्न मधेस क्रिकेट लिग सिजन १ को उपाधी बारा जिल्लाले उचालेको छ ।
    आजको सम्पन्न २० ओभरको फाईनल खेलमा सप्तरीले २० ओभर खेल्दै दिएको ९३ रनको लक्ष्य बाराले १४.३ ओभरमा पछ्याउन सफल भएको थियो । सप्तरीका तर्फबाट अभिषेक कार्कीले  १६ रनको योगदान दिएका थिए । उनले २३ बलमा १ छक्का र १ चौका प्रहार गरेका थिए । 
    बलिङतर्फ बाराका निखिल सिंह, पवन सर्राफ, कमल गुप्ताले क्रमशः २–२ विकेट लिएका थिए भने भूलवान सहनी र अरनिको यादवले समान १–१ विकेट लिएका थिए । 
    यसैगरी ९४ रनको लक्ष्यका साथ मैदानमा उत्रेको बारा जिल्ला क्रिकेट टिमका ब्याटस् म्यान साहिल पटेलले ३३ बल खेल्दै एक छक्का र ६ चौकाको मदतले सर्वाधिक ४१ रन आफ्नो टिमका लागि जोडेका थिए । अर्का खेलाडी पवन सर्राफले अविजित रही २० रन जोडेका थिए । त्यस्तै आदिल अन्सारीले १८ रन बनाएका थिए ।
    त्यस्तै बलिङतर्फ सप्तरीका नितेश यादव, पप्पु यादव, महम्मद साकिम आलमले क्रमशः १–१ विकेट लिएका थिए ।
    क्रिकेट संघ प्रदेशका अध्यक्ष सुनिल महासेठको अध्यक्षतामा सम्पन्न समापन समारोहका प्रमुख अतिथी मधेश प्रदेशका खेलकुद मन्त्री प्रमोद जयसवालले सरकारले क्रिकेट लगायत अन्य खेलको विकासको लागि आउने आर्थिक वर्षमा विशेष योजना ल्याउन लागेको बताउंदै मधेशका ८ वटै जिल्लामा खेल मैदानको योजना सरकारले अगाडी सारेको बताए । उनले क्रिकेटमा यूवाहरुको भविष्य देखेको बताउंदै यसको विकासका लागि आवश्यक योजना सहित अगाडी बढ्ने जनाए ।
    यसैगरी कार्यक्रमका विशिष्ठ अतिथी नेपाल क्रिकेट संघका सचिव एवम् पूर्व राष्ट्रिय क्रिकेट खेलाडी पारस खडकाले विजयी टिमलाई बधाई दिंदै मधेश प्रदेशमा यस प्रकारका लिगको आयोजनाले खेलाडीहरुलाई उर्जा प्रदान गर्ने र नयां खेलाडीलाई क्रिकेट तर्फ आकर्षण बढ्ने बताउंदै संघका तर्फबाट हुनसक्ने हरेक सहयोग उपलब्ध गराउने प्रतिवद्धता जनाए ।
    यस लिगका आयोजक एवम् पर्सा क्रिकेट संघका अध्यक्ष्ँ मनिष सिंहले लिगमा सहयोग गर्नुहुने सम्पूर्ण सहयोगी हातहरुलाई धन्यवाद दिंदै मधेशका हरेक जिल्लामा क्रिकेटलाई प्रोत्साहित गर्न र यस प्रकारका खेलहरुलाई निरन्तरता दिन आफू सम्बन्धित निकायहरुसंग समन्वयका साथ अगाडी बढिरहेको बताए ।
    कार्यक्रममा प्रदेशसभा सदस्य श्याम पटेल, बिना जयसवाल, क्रिकेट संघका केन्द्रिय, प्रदेश र जिल्लाका पदाधिकारी, खेलकुद विकास समितिका पदाधिकारी लगायत विभिन्न संघ संस्थाका पदाधिकारी सदस्यहरुको उपस्थिती रहेको थियो ।