वीरगन्ज – नेशनल इनफोटेक कप २०७९ अन्तर्गत दोस्रो दिन भएका दुई वटा खेलमा वीरगन्ज पब्लिक कलेज र नेशनल इनफोटेक कलेज विजयी भएका छन् । पहिलो खेलमा वीरगन्ज पब्लिक कलेजले वीरगन्ज कलेजलाई ४१ रनले पराजित गरेको थियो ।

४ विकेट लिएका बालमिकी राउत म्यान अफ दि म्याच घोषित भएका थिए । टस जितेर पहिले वीरगन्ज कलेजले वीरगन्ज पब्लिक कलेजलाई पहिले ब्याटिङको निम्तो दिएको थियो । बीपीसीका खेलाडीहरुले २० ओभरमा १४६ रन बनाएका थिए ।

बीपीसीका तौफिक सेखले सर्वाधिक २९ रनको योगदान गरेका थिए । यसैगरि बीपीसीका निरज यादवले २७ रन र सिद्दिक अन्सारीले २३ रन बनाएका थिए । वीरगन्ज कलेजका रेहान गुप्ताले ४ र निरज गुप्ताले २ विकेट लिएका थिए । १४७ रनको लक्ष्य पछ्याएको वीरगन्ज कलेजका खेलाडीहरु १०५ रनमै सिमित भएका थिए ।

वीरगन्ज कलेजका युवराज यादवले ३६ रन बनाएका थिए । बीपीसीका बालमिकी यादवले कसिलो बलिङ गर्दै २ ओभर ५ बलमा ४ विकेट लिएका थिए ।
दोस्रो खेलमा आयोजक नेशनल इनफोटेक कलेजले इम्पेरियल कलेजलाई १० विकेटको फराकिलो अन्तरले पराजित गरेको थियो । टस जितेर पहिले ब्याटिङ गरेको इम्पेरियल कलेजले १४ ओभरमा अलआउट भई जम्मा ६५ रन बनाएको थियो । इम्पेरियलका पारसनाथ यादव (१३ रन) र मन्टु यादव (११ रन) ले मात्र दोहोरो अंकमा रन स्कोर गर्न सफल भएका थिए ।

इनफोटेकका सोनु कुशवाहाले सर्वाधिक ३ विकेट र रन्जित कुमारले २ विकेट लिएका थिए । ६६ रनको लक्ष्य इनफोटेक कलेजले विना विकेट गुमाई १० ओभरमै हासिल गरेको थियो । इनफोटेकका आर्दश अनुप साहले सर्वाधिक ४२ रन र रोहित जयसवालले १५ रन बनाएका थिए । इनफोटेकका सोनु कुशवाहा म्यान अफ दि म्याच घोषित भएका थिए ।