वीरगञ्ज । चीनको सिजाङ स्वायत्त क्षेत्रअन्तर्गत नेपाल–चीन सीमाक्षेत्र नजिकै गएको विनाशकारी पहिरोपछि छोचेन खोला र पुरेपु साङ्पो नदीको संगमस्थल नजिक ठूलो ताल बनेको छ। चिनियाँ जलस्रोत मन्त्रालयका अनुसार बिहीबार बिहानसम्म उक्त तालमा करिब २० लाख घनमिटर पानी जम्मा भइसकेको छ।

तालमा पानी भरिएर बाहिर बग्न थालेको र आगामी तीन दिनमा थप करिब ३० लाख घनमिटर पानी थपिन सक्ने अनुमान गरिएको छ। पानीको मात्रा निरन्तर बढेपछि ताल फुट्ने जोखिम उच्च रहेको चिनियाँ सञ्चारमाध्यमले जनाएका छन्।

चीनको ग्लोबल टाइम्सका अनुसार चिनियाँ जलस्रोत मन्त्रालयले तालको विकासक्रमलाई निरन्तर निगरानी गरिरहेको छ। सम्भावित ताल फुट्ने अवस्था र त्यसबाट हुन सक्ने बाढीको प्रभाव आकलन गर्न बाढीको सिमुलेशन तथा जोखिम विश्लेषण भइरहेको छ।

*चाइना सेन्ट्रल टेलिभिजन (CCTV)*ले समेत पानीको मात्रा अत्यधिक बढेकाले ताल फुट्ने जोखिम उच्च रहेको जनाएको छ। सम्भावित विपद्का लागि आपत्कालीन उद्धार तथा प्रतिक्रिया योजनासमेत अघि बढाइएको चिनियाँ अधिकारीहरूले बताएका छन्।

यसैबीच, नेपाल–चीन सीमाको चिनियाँतर्फ रहेको दक्षिणपश्चिमी सिजाङ क्षेत्रको ग्यारोङ बन्दरगाह आसपास पहिरोपछि उद्धार तथा राहत कार्य तीव्र पारिएको छ। चिनियाँ अधिकारीहरूले आपत्कालीन प्रतिक्रियाकर्ता, जनमुक्ति सेना, इन्जिनियरिङ टोली, दूरसञ्चारकर्मी तथा राहत संस्थाहरू परिचालन गरेका छन्।

निरन्तर वर्षा, कठिन भौगोलिक अवस्था र थप पहिरो तथा अन्य द्वितीयक प्रकोपको जोखिमबीच उद्धार टोलीले प्रभावित क्षेत्रमा जनशक्ति, विमान, उपकरण र राहत सामग्री पुर्‍याइरहेका छन्।

ताल फुटेको अवस्थामा त्यसबाट निस्कने पानीले नदीको बहाव अचानक बढाउन सक्ने भएकाले सीमावर्ती तथा तल्लो तटीय क्षेत्रमा सम्भावित प्रभावबारे पनि निगरानी र पूर्वतयारी आवश्यक देखिएको छ।