वीरगन्ज– जनता समाजवादी पार्टी पर्साको विवाद समाधान भएको छ । शुक्रबार राति अबेर सम्म वीरगन्जको होटल पुजनमा पार्टीका केन्द्रीय अध्यक्ष एवम् उपप्रधान तथा स्वास्थ्यमन्त्री उपेन्द्र यादव, पूर्व मन्त्री एवम् पर्सा क्षेत्र नम्बर १ का सांसद प्रदीप यादव, वीरगन्जका मेयर राजेशमान सिंह, पार्टीका मधेश प्रदेश इन्चार्ज बालकिशोर यादव, दुईवटा समानन्तर कमिटिका अध्यक्षद्धय रामनरेश यादव र सिंघाशन साह कलवार लगायत नेताहरुको उपस्थितीमा पार्टीको जिल्ला कार्यसमितिको विवाद समाधान भएको हो । 

विगत लामो समयदेखि जिल्लामा विवाद हुंदा २ वटा समानान्तर कार्यसमिति निर्माण भएका थिए । पार्टीको महाधिवेशनका लागि क्रियाशिल सदस्यता काट्ने र होलीपछि कार्यसमिति पुर्नगठन गर्ने सहमति भएको पूर्व मन्त्री एवम् सांसद प्रदीप यादवले जनाए । 

‘पुरानो कुरा भुलेर नया तरिकाले अगाडि बढ्ने सहमति भएको छ,’ सांसद यादवले भने, ‘होलीपछि नै कार्यसमिति पुर्नगठन गर्ने, क्रियाशिल सदस्यता वितरण गर्नेमा सबै पक्ष सहमत भएका छौ ।’ पार्टी पुर्नगठनमा पुराना सिनियर साथी कोही पनि नछुट्न भन्ने पनि सहमति भएको छ ।