वीरगञ्ज – आचारसंहिता उल्लंघन गर्दै निर्वाचन प्रचारप्रसार गरेको विषयमा निर्वाचन आयोगले पूर्वश्रममन्त्री कृष्णकुमार श्रेष्ठ (किसान)सँग २४ घण्टे स्पष्टीकरण माग गरेको छ।

एकीकृत समाजवादीबाट बारा– ४ मा उम्मेदवार बनेका श्रेष्ठले बेरोजगार युवालाई फ्री भिसा, फ्री टिकटमा विदेश पठाइदिने प्रलोभन देखाएको आयोगले जनाएको छ। श्रेष्ठले सत्ता गठबन्धनको तर्फबाट बारा ४का उम्मेदावर बनेका हुन् ।

श्रेष्ठले यसअघिको निर्वाचनमा नेकपा एमालेका तर्फबाट नेपाली कांग्रेसका वरिष्ठ नेता रामचन्द्र पौडेललाई तनहुँ क्षेत्र नम्बर १ मा पराजित गरेका थिए ।श्रेष्ठले तनहुँ क्षेत्रमा टिकट नपाएपछि बारा रोजेका हुन् ।

बाराका मतदातालाई प्रलोभन देखाएको उक्त भिडियो प्राप्त भएको भन्दै आयोगले श्रेष्ठलाई आफ्नो उम्मेदवारी रहेको निर्वाचन अधिकृतको कार्यालय वा आयोगमा लिखित स्पष्टीकरण पेस गर्न निर्देशन दिएको छ।