वीरगन्ज– इतिहासमै पहिलो पटक वीरगन्ज उद्योग वाणिज्य संघ घाटामा गएको खुलासा भएको छ । आर्थिक वर्ष २०७९/८० को आर्थिक प्रतिवेदन (आयव्यय) सार्वजनिक भएपछि संघ घाटामा गएको खुलेको हो । लेखापरीक्षक अरविन्द खेतानको फर्मले संघको आर्थिक प्रतिवेदन तयार पारेको हो । आर्थिक वर्ष २०७९/८० मा १ करोड ६७ लाख ४६ हजार रुपैया संघलाई घाटा भएको खेतानले तयार पारेको आयव्यय विवरणमा उल्लेख गरिएको छ । जबकि अघिल्लो आर्थिक वर्षमा संघलाई ५५ लाख ४ हजार रुपैया आम्दानी भएको थियो । यही अवधिमा संघको एक करोड २५ लाख रुपैया“को पुरानो एफ.डी (फिक्सड डिपोजिट) समेत तोडिएको छ ।

डा.सुवोध गुप्ताको कार्यकालमा संघ १ करोड ६७ लाख ४६ हजार रुपैया घाटामा गएको तथ्य सहित सार्वजनिक भएपछि हालका पदाधिकारी तथा पूर्व अध्यक्षहरुले आलोचना गरेका छन् । आर्थिक अनियमितता छानबिनको माग गरेका छन् । सुरुमा लेखापरिक्षक खेतानले समेत आयव्यय प्रतिवेदनमा हस्ताक्षर गर्न नमानेको स्रोतको दाबी छ । दबाब गएपछि करिब एक हप्तापछि खेतानले आयव्ययको प्रतिवेदनमा हस्ताक्षर गरेका थिए । 

वीरगन्ज उद्योग वाणिज्य संघले सर्टिफिकेट अफ ओरिजन (सी.ओ)बाट नै मूख्य आम्दानी गर्ने गरेको छ । आर्थिक वर्ष २०७८/७९ मा संघले सीं.ओ.बाट १ करोड ९६ लाख ५८ हजार रुपैया आम्दानी गरेको थियो । तर, आर्थिक वर्ष २०७९/८० मा सी.ओ.बाट हुने आम्दानी झन्डै एक करोड रुपैयाले घटेको पाइएको छ । उक्त आर्थिक वर्ष संघले ९८ लाख ९ हजार रुपैया मात्र सी.ओ.बाट आम्दानी गरेको देखिन्छ ।

सी.ओ.बाट भएको आम्दानी व्यापक रुपमा हिनामिना भएको छ । ‘सी.ओ.बाट भएको आम्दानीको रेकर्ड राखिएको छैन्,’ नाम उल्लेख नगर्ने शर्तमा संघका एक पदाधिकारी भन्छन्, ‘सी.ओ. जारी गरिएको छ । तर, आम्दानी लेखामा दाखिला नगरि मनलाग्दी खर्च गरिएको छ ।’ मनपरि खर्चमा त्यसबेलाका कोषाध्यक्ष्ँ गोविन्द शाह र सहकोषाध्यक्ष प्रेम गोयलले समेत सहयोग गरेको देखिन्छ । 

यसैगरि संघको कार्यालयमा कार्यरत कर्मचारीको तलब भक्तामा समेत अस्वभाविक खर्च वृद्धि गरिएको छ । कर्मचारीको तलब/भक्तामा अघिल्लो आर्थिक वर्षमा ७४ लाख रुपैया खर्च भएको थियो । तर, आर्थिक वर्ष २०७९/८० मा ५३ लाख थपेर तलब/भक्तामा १ करोड २७ लाख रुपैया खर्च भएको छ । स्रोतका अनुसार आर्थिक अनियमिततामा संघका केही कर्मचारीले समेत बील/भरपाई बनाएर सघाउने गरेका छन् । उमेर हदले रिटायर भएपनि केही कर्मचारीलाई यसकै लागि राखिएको छ । 

संघका तत्कालिन अध्यक्ष डा.गुप्ताको नेतृत्वमा परिवार सहित पदाधिकारी तथा सदस्यहरु सिंगापुर भ्रमणमा गएको बेला ३९ लाख रुपैया खर्च भएको थियो । सो भ्रमणबाट के उपलब्धी भयो ? भन्ने कुरा आजसम्म वीरगन्जका उद्योगी÷व्यापारीले थाहा पाएका छैनन् । संघका सदस्य तथा युवा व्यवसायी नवनीत अग्रवालका अनुसार तत्कालिन अध्यक्ष सुवोध गुप्ताले अधिकार मिचेर मनलाग्दी पैसा खर्च गरेकाले वीरगन्ज उद्योग वाणिज्य संघ आफ्नो इतिहासमै पहिलो पटक घाटामा गएको हो ।

‘सेवाभाव भन्दा पनि संघको पैसामा मनमौजी गर्ने नियतले नेतृत्व लागेको देखियो,’ अग्रवाल भन्छन्, ‘अनियमितताको छानबिन गर्नुपर्छ ।’ संघको विधान बमोजिम अध्यक्षले एकपटकमा ५ हजार रुपैया र पदाधिकारीले १० हजार रुपैया खर्च गर्ने अधिकार छ । यसमा लेखापरीक्षकको रिर्पोट मौन छ । सी.ओकोको हिसाबको सम्बन्धमा आम्दानीमा समेत लेखापरीक्षकको प्रतिवेदनले केही बोलेको छैन् ।