वीरगञ्ज । राष्ट्रिय स्वतन्त्र पार्टी (रास्वपा) जिल्ला कार्यसमिति पर्साले आगामी प्रतिनिधि सभा सदस्य निर्वाचनका लागि पार्टीको समानुपातिक उम्मेदवार छनोट मापदण्ड औपचारिक रूपमा सार्वजनिक गरेको छ। शुक्रबार वीरगञ्जस्थित होटल क्लासिक ब्याङ्कमा आयोजित पत्रकार सम्मेलनमार्फत उक्त जानकारी सार्वजनिक गरिएको हो।

जिल्ला सभापति हरि पन्तका अनुसार समानुपातिक बन्दसूची तयार गर्ने प्रक्रिया पूर्ण रूपमा पारदर्शी, वैज्ञानिक र समावेशी बनाउन केन्द्रीय समितिबाट विस्तृत मापदण्ड तयार गरिएको हो। उनका अनुसार पार्टी जिम्मेवारी, नेतृत्व क्षमता, लिडरसिप एकेडेमीमा सहभागिता, राजनीतिक अभिप्राय, समावेशीता तथा प्रारम्भिक निर्वाचनलाई अनिवार्य रूपमा मूल्यांकन गरिनेछ।

पार्टीले तोकेको मापदण्डअनुसार समानुपातिक सांसदका उम्मेदवारले नौ मुख्य शर्त पूरा गर्नुपर्ने पन्तले जानकारी दिए। ती शर्तमा नेपालको कानुन बमोजिम अयोग्य नठहरिएको हुनु, प्रहरी रिपोर्ट पेस गरेको तथा कालो सूचिमा नपरेको हुनु, पारिवारिक आधारभूत आवश्यकता पूरा गर्न सक्षम हुनु, पारदर्शी आम्दानी स्रोत रहेको हुनु र सम्पत्ति विवरण पार्टीमा बुझाएको हुनु जस्ता मापदण्ड समावेश छन्। साथै पार्टी अनुशासन समितिबाट अयोग्य नठहरिएको, अन्य दल परित्याग गरी रास्वपामा प्रवेश गरेको, सार्वजनिक पद दुरुपयोग नगरेको प्रमाणित हुनु तथा पार्टीको सुशासन, शान्ति र समृद्धिप्रतिको प्रतिबद्धता अनिवार्य मानिनेछ।

सभापति पन्तले नेपालको स्वतन्त्रता, सार्वभौमिकता, भौगोलिक अखण्डता र सांस्कृतिक विविधतायुक्त राष्ट्रिय एकता जोगाउँदै सुशासन र दिगो समृद्धि कायम राख्नु पार्टीको मूल लक्ष्य भएको बताए। उनका अनुसार फागुन २१ गते हुने प्रतिनिधि सभा निर्वाचनलाई लक्षित गर्दै रास्वपाले अग्रिम रूपमा रणनीतिक तयारी सुरु गरिसकेको छ।

कार्यक्रममा नेता तथा कार्यकर्ताको उल्लेख्य उपस्थिति थियो। उपस्थित मध्ये केन्द्रीय सदस्य डा. नन्दन यादव, मधेस प्रदेश सञ्चार प्रमुख राम सर्राफ, संगठन विभाग उपप्रमुख प्रमोद कुमार, प्रदेश शिक्षा प्रमुख सबु कडेल, उपप्रमुख सोनालाल पटेल, जिल्ला कोषाध्यक्ष दिलिप प्रसाद कुर्मी, सहसचिव तथा संगठन प्रमुख कृष्ण पासवान, नेता पुरुषोत्तम उपाध्याय, प्रदीप पटेललगायतको सहभागिता उल्लेखनीय रह्यो।