वीरगञ्ज । वीरगञ्जस्थित रक्तसञ्चार केन्द्रमा पछिल्ला तीनदेखि चार महिनायता रगतको अभाव चुलिएको छ। केन्द्रका प्राविधिक प्रमुख सौरभराज पाण्डेयका अनुसार गत वैशाखदेखि वीरगञ्जको मुख्य सडक फराकिलो बनाउने सडक विभागको अभियान सुरु भएपछि नियमित रक्तदान कार्यक्रम प्रभावित हुँदा रगत सङ्कलन उल्लेख्य रूपमा घटेको हो।

पाण्डेयका अनुसार विगतका वर्षहरूमा अत्यधिक गर्मीयाम, जाडोयाम तथा चाडपर्वका बेला केही समयका लागि रगतको अभाव हुने गरे पनि विभिन्न सङ्घसंस्था र स्वेच्छिक रक्तदाताको सक्रियताले समस्या एक साताभन्दा बढी लम्बिने गरेको थिएन। तर यस वर्ष वैशाखदेखि असारसम्म लगातार रगतको अभाव कायम रहेको उनले बताए।

नारायणी अस्पतालको छपकैया परिसरमा सञ्चालन हुँदै आएको रक्तसञ्चार केन्द्र सडक विस्तारको सीमाभित्र परेपछि केन्द्रलाई स्थानान्तरण गरी हाल घण्टाघरस्थित नेपाल रेडक्रस सोसाइटीको भवनबाट सेवा सञ्चालन भइरहेको छ। केन्द्र स्थानान्तरण र सडक विस्तारका कारण नियमित रूपमा सञ्चालन हुने रक्तदान कार्यक्रम प्रभावित भएको पाण्डेयले जानकारी दिए।

उनका अनुसार यसअघि मासिक करिब २० वटा रक्तदान कार्यक्रम सञ्चालन हुने गरेकामा हाल त्यो सङ्ख्या घटेर पाँचवटामा सीमित भएको छ। रक्तदान कार्यक्रम उल्लेख्य रूपमा घट्दा रगत सङ्कलनमा प्रत्यक्ष असर परेको उनले बताए।

रक्तसञ्चार केन्द्रमा दैनिक करिब ७० पिन्ट रगतको माग हुने गरे पनि आवश्यक परिमाणमा रगत सङ्कलन हुन नसक्दा बिरामीको उपचार प्रभावित हुन थालेको छ। विशेषगरी आकस्मिक शल्यक्रिया, सवारी दुर्घटनाका घाइते, सुत्केरी महिला तथा दीर्घरोगी बिरामीका लागि आवश्यक रगत उपलब्ध गराउन कठिनाइ भइरहेको केन्द्रले जनाएको छ।

रगत अभावका कारण अस्पतालहरूले बिरामीका आफन्तलाई आफैं रक्तदाता खोज्नुपर्ने अवस्था सिर्जना भएको भन्दै केन्द्रले यसलाई गम्भीर मानवीय चुनौतीका रूपमा लिएको जनाएको छ।

रक्तसञ्चार केन्द्रले विभिन्न सामाजिक सङ्घसंस्था, युवा क्लब, शैक्षिक संस्था तथा इच्छुक नागरिकलाई रक्तदान अभियानमा सक्रिय सहभागिता जनाई रगतको अभाव हटाउन सहयोग गर्न आग्रह गरेको छ। केन्द्रका अनुसार नियमित र स्वेच्छिक रक्तदान नै रगतको अभाव समाधान गर्ने सबैभन्दा प्रभावकारी उपाय हो।