वीरगञ्ज। राष्ट्रिय स्वतन्त्र पार्टी (रास्वपा) पर्सामा हालै सम्पन्न जिल्ला अधिवेशनपछि आन्तरिक विवाद चुलिएको छ । जिल्ला अधिवेशनबाट निर्वाचित पदाधिकारी तथा सदस्यहरूबीच जिम्मेवारी बाँडफाँट र संगठन सञ्चालनको विषयलाई लिएर मतभेद बढ्दै गएको स्रोतहरूले बताएका छन् ।

हालै सम्पन्न अधिवेशनबाट पर्सा क्षेत्र नं. १ का सांसद हरि पन्त निकट समूह विजयी भएको थियो । उक्त अधिवेशनबाट दिलीप कुर्मी उपाध्यक्ष, सुष्टि प्रजापति सचिवसहित विभिन्न पदाधिकारी निर्वाचित भएका थिए ।

तर अधिवेशनपछि ९ सदस्यीय जिल्ला सदस्यहरूमध्ये तुलसा अधिकारीलाई कोषाध्यक्षमा मनोनयन गरी कार्यवाहक अध्यक्षको जिम्मेवारी दिइएको विषयलाई लिएर पार्टीभित्र असन्तुष्टि बढेको बताइएको छ । केही पदाधिकारी तथा सदस्यहरूले निर्णय प्रक्रिया पारदर्शी नभएको र व्यापक छलफल नगरी निर्णय गरिएको आरोप लगाएका छन् ।

असन्तुष्ट पक्षका नेताहरूले जिल्ला संगठन सञ्चालनमा सामूहिक नेतृत्वको भावना कमजोर बन्दै गएको दाबी गरेका छन् । उनीहरूका अनुसार महत्वपूर्ण निर्णयहरूमा निर्वाचित पदाधिकारीहरूको पर्याप्त सहभागिता सुनिश्चित नभएको गुनासो बढ्दै गएको छ ।

केही सदस्यहरूले सांसद हरि पन्तले संगठन सञ्चालनमा अत्यधिक प्रभाव जमाउँदै एकलौटी ढंगले निर्णय गरिरहेको आरोप लगाएका छन् । उनीहरूको भनाइमा पार्टीको जिल्ला संरचनालाई संस्थागत प्रक्रियाअनुसार अघि बढाउनुको सट्टा सीमित व्यक्तिहरूको परामर्शमा निर्णय हुने प्रवृत्ति देखिएको छ ।

यद्यपि, हरि पन्त पक्षले भने यस्ता आरोपहरू अस्वीकार गर्दै पार्टीलाई व्यवस्थित र प्रभावकारी बनाउन आवश्यक निर्णयहरू गरिएको दाबी गरेको बताइएको छ । उनी निकट नेताहरूले संगठनभित्र देखिएको असन्तुष्टि सामान्य आन्तरिक विषय भएको र संवादमार्फत समाधान गरिने बताएका छन् ।

जिल्ला अधिवेशनपछि सुरु भएको यो विवादले रास्वपा पर्साको संगठनात्मक एकतामाथि प्रश्न उठाएको छ । आगामी दिनमा नेतृत्व पक्ष र असन्तुष्ट समूहबीच सहमति कायम हुन नसके पार्टीको स्थानीय संगठन थप प्रभावित हुन आंकलन गर्न सकिन्छ ।

पार्टीभित्रको विवाद सार्वजनिक रूपमा बाहिरिन थालेपछि रास्वपा पर्साको आन्तरिक व्यवस्थापन र नेतृत्व शैलीबारे विभिन्न तहमा चर्चा सुरु भएको छ । अब नेतृत्वले असन्तुष्ट पक्षका गुनासाहरूलाई कसरी सम्बोधन गर्छ भन्ने विषयलाई चासोका साथ हेरिएको छ ।