पर्सा । पर्सा निर्वाचन क्षेत्र नम्बर ४ मा नेकपा एमालेका प्रतिनिधिसभा सदस्य पदका उम्मेदवार जालिम मियाँ यतिबेला चुनावी अभियानको केन्द्रमा घरदैलो कार्यक्रमलाई राखेर अघि बढिरहेका छन्। जगरनाथपुर गाउँपालिकाका विभिन्न वडामा गरिएको पछिल्लो अभियान केवल औपचारिक मत माग्ने प्रक्रिया मात्र रहेन, बरु स्थानीय जनताको पीडा, अपेक्षा र असन्तुष्टि बुझ्ने राजनीतिक संवादको सशक्त माध्यम बनेको छ।

घरदैलोका क्रममा जालिम मियाँले स्थानीयसँग प्रत्यक्ष संवाद गर्दै विगतका कमजोरी स्वीकार, वर्तमानका चुनौती विश्लेषण र भविष्यका प्राथमिकता प्रस्तुत गरे। उनले भने, “म भोट माग्न मात्रै होइन, जनताको आवाज सुन्न आएको हुँ।”

स्थानीयको घरआँगनमै बसेर उनले क्षेत्रको विकास अवस्था, बेरोजगारी, शिक्षा र स्वास्थ्य सेवाको कमजोर पहुँच, सडक र पूर्वाधारको समस्या तथा युवाहरूको पलायनबारे जानकारी लिए। स्थानीयले उठाएका सवाल र सुझावलाई उनले आगामी संसदीय भूमिकाको आधार बनाउने प्रतिबद्धता व्यक्त गरे। उनले भने “पर्सा–४ का समस्या काठमाडौं पुर्‍याउने मात्र होइन, समाधानका लागि दबाब सिर्जना गर्ने सांसद बन्छु।”

२०७९ सालको प्रतिनिधिसभा निर्वाचनमा करिब पाँच हजार मतले पराजित हुनु जालिम मियाँका लागि राजनीतिक रूपमा ठूलो झट्का थियो। तर उनी त्यसलाई पराजय होइन, राजनीतिक अनुभव र पाठका रूपमा व्याख्या गर्छन्।
उनको विश्लेषणमा, पटक–पटक निर्वाचित भइसकेका जनप्रतिनिधिहरूले जनअपेक्षा अनुसार काम गर्न नसक्नु नै आफूलाई पुनः मैदानमा उत्रन प्रेरणा बनेको हो।

घरदैलो अभियानभरि जालिम मियाँले एमालेको राजनीतिक लाइनलाई ‘स्थायित्व र विकास’को नारासँग जोडेर प्रस्तुत गरेका छन्। उनले देश अहिले असन्तुष्टि, अन्योल र ‘जेन–जी आन्दोलन’ जस्ता प्रवृत्तिका कारण गलत दिशातर्फ गइरहेको दाबी गर्दै भने, “देशलाई सही दिशामा लैजान बलियो नेतृत्व चाहिन्छ, त्यो एमालेसँग मात्रै सम्भव छ।”

उनको दाबीमा, एमाले नेतृत्वको सरकार बने मात्र सुशासन, विकास र दीर्घकालीन नीति प्रभावकारी रूपमा कार्यान्वयन हुन सक्छ। यसपटक बहुमतसहित एमाले विजयी भए देशले स्पष्ट दिशा पाउने उनको विश्वास छ।

पर्सा–४ मा जालिम मियाँको घरदैलो अभियान केवल चुनावी कर्मकाण्ड होइन, राजनीतिक पुनरागमनको प्रयासका रूपमा देखिएको छ। विगतको हारलाई आत्मसात् गर्दै, स्थानीयसँग प्रत्यक्ष संवाद र एमालेको स्थायित्वको राजनीतिक कथनमार्फत उनी मतदाताको विश्वास पुनः जित्ने प्रयासमा छन्।