वीरगञ्ज । काठमाडौँ महानगरपालिकाका मेयर बालेन्द्र शाह (बालेन) ले आज पदबाट राजीनामा दिएका छन् । आजदेखि नै लागू हुने गरी उनले उपमेयर सुनिता डङ्गोलसमक्ष राजीनामा पत्र बुझाएका हुन् ।

स्वतन्त्र उम्मेदवारका रूपमा २०७९ को स्थानीय तह निर्वाचनमा ऐतिहासिक जित हासिल गर्दै मेयर बनेका शाहले राष्ट्रिय राजनीतिमा प्रवेश गर्ने तयारी स्वरूप राजीनामा दिएका छन् । राजीनामा लगत्तै उनी राष्ट्रिय स्वतन्त्र पार्टी (रास्वपा) को केन्द्रीय कमिटी बैठकमा सहभागी हुने कार्यक्रम रहेको छ । बैठक दिउँसो ३ बजे बस्ने बताइएको छ । स्रोतका अनुसार शाह आगामी फागुन २१ गते हुने प्रतिनिधिसभा निर्वाचनमा रास्वपाबाट प्रधानमन्त्री पदका उम्मेदवार बन्ने तयारीमा छन् । पार्टीले उनलाई वरिष्ठ नेताको जिम्मेवारी दिइसकेको छ । राजीनामापछि उनको राष्ट्रिय राजनीतिक यात्रा औपचारिक रूपमा सुरु हुने भएको हो ।

मेयर पदबाट राजीनामा दिएसँगै काठमाडौँ महानगरपालिकाको जिम्मेवारी उपमेयर सुनिता डङ्गोलले सम्हाल्नेछिन् । कानुनी व्यवस्थाअनुसार पद रिक्त भएमा उपनिर्वाचन हुन सक्ने सम्भावना छ । बालेनको निर्णयले नेपाली राजनीतिमा नयाँ तरङ्ग ल्याउने अपेक्षा गरिएको छ । युवा पुस्तामा लोकप्रिय शाहको कदमलाई धेरैले राष्ट्रिय परिवर्तनको सङ्केतका रूपमा हेरेका छन् ।

यता जेनजी आन्दोलनका अगुवा मध्येका एक सुधन गुरुङ रास्वपा प्रवेश गर्ने भएका छन्।