वीरगंज । आगामी फागुनमा हुने प्रतिनिधिसभा निर्वाचनका लागि जिल्ला निर्वाचन कार्यालय पर्साले सङ्कलन गरेको मतदाता नामावलीअनुसार पर्सा जिल्लामा कुल ३ लाख ७६ हजार ५१३ जना मतदाता रहेका छन्।

यसअघिको प्रतिनिधिसभा निर्वाचन–२०७९ मा पर्सामा कुल मतदाता संख्या ३ लाख ५२ हजार ४८४ रहेकामा यसपटक २४ हजार २९ जना मतदाता थपिएका हुन्।

नयाँ नामावलीअनुसार पर्सामा महिला १ लाख ६४ हजार ४२१, पुरुष २ लाख १२ हजार ७७ तथा अन्य १५ जना मतदाता छन्। जिल्लाभर १६७ वटा मतदानस्थल र ४४१ वटा मतदान केन्द्र तोकिएका छन्।

जिल्ला निर्वाचन कार्यालय पर्साका अनुसार निर्वाचन क्षेत्र नं १ मा महिला र पुरुष गरी ९० हजार ६३ जना मतदाता, ३४ मतदानस्थल र १०३ मतदान केन्द्र रहेका छन्।
त्यस्तै निर्वाचन क्षेत्र नं २ मा ९५ हजार १२० मतदाता, ३८ मतदानस्थल र ११० मतदान केन्द्र छन्।

निर्वाचन क्षेत्र नं ३ मा महिला–पुरुष गरी ९६ हजार ५४२ मतदाता, ४७ मतदानस्थल र ११४ मतदान केन्द्र रहेका छन् भने निर्वाचन क्षेत्र नं ४ मा ९५ हजार २१३ मतदाता, ४८ मतदानस्थल र ११४ मतदान केन्द्र रहेका छन्।

जिल्ला निर्वाचन कार्यालय पर्साकी प्रमुख अनमिका रौनियारका अनुसार यसपटक प्रतिनिधिसभाको निर्वाचन मात्र हुने भएकाले गाउँपालिका तथा नगरपालिकास्तरीय मतदाताको विवरण निर्वाचन आयोगले सार्वजनिक नगरेको जानकारी दिइन्।