वीरगञ्ज । गत शुक्रबारदेखि सुरु भएको झाडापखालाको प्रकोप वीरगञ्जमा अझै नियन्त्रणमा आउन सकेको छैन। सङ्क्रमण फैलिँदै जाँदा नजिकैका गाउँमा समेत लक्षण देखिन थालेपछि स्थानीय बासिन्दा त्रसित भएका छन्।

पर्सा स्वास्थ्य कार्यालयका प्रमुख विनोद झाले पोखरिया अस्पतालमा उपचाररत पाँच बिरामीमध्ये दुई जनामा कोलेरा पोजेटिभ पुष्टि भएको जानकारी दिनुभयो। उहाँका अनुसार संक्रमित सबै विद्यार्थी हुन्, जो वीरगञ्जमा अध्ययनरत थिए तर घर गएको बेला बिरामी परेका हुन्। बिरामी हुनेमा धोबिनी गाउँपालिका, विन्ध्यवासिनी गाउँपालिका र पोखरिया क्षेत्रका पाँच जना रहेका छन्।

यसैबीच, वीरगञ्जबाट संकलित नमूनाहरू परीक्षण गर्दा १० मध्ये ८ मा हैजा पुष्टि भएको राष्ट्रिय जनस्वास्थ्य प्रयोगशाला, टेकुका प्रमुख डा. रञ्जन भट्टले जानकारी दिनुभयो। “कल्चर परीक्षणमा ८० प्रतिशतभन्दा बढीमा हैजा देखिनु समुदायस्तरमा फैलिएको प्रमाण हो,” उहाँले बताउनुभयो।

वीरगञ्ज महानगरको स्वास्थ्य महाशाखाका अनुसार हालसम्म १७१ जना बिरामी उपचारपछि डिस्चार्ज भइसकेका छन्। तर सोमबार साँझ ८ बजेदेखि मंगलबार बिहान ८ बजेसम्म मात्रै ६२ जना नयाँ बिरामी अस्पताल भर्ना भएका छन्।

शुक्रबारदेखि मंगलबार बिहानसम्म वीरगञ्जका विभिन्न अस्पतालमा ३९१ जना झाडापखालाका बिरामी उपचारका लागि पुगेका छन्। तीमध्ये करिब ४४ प्रतिशत बिरामी निको भई घर फर्किएका छन्।

यता, वीरगञ्जमा संक्रमितमध्ये करिब ११ प्रतिशत बिरामीको अवस्था अत्यन्त गम्भीर रहेको पाइएको छ। हाल विभिन्न अस्पतालमा उपचाररत २२० मध्ये २४ जनालाई सघन उपचार कक्ष (आइसीयू) मा राखिएको छ। वीरगञ्ज हेल्थ केयर अस्पतालका सञ्चालक डा. अबुलहैस अंसारीका अनुसार अत्यधिक झाडापखालाका कारण बिरामीहरूको शरीरमा पानीको मात्रा खतरनाक रूपमा घटेको र मृगौलामा समस्या देखिएको छ।

गम्भीर बिरामीमध्ये ९ जना वीरगञ्ज हेल्थ केयर अस्पतालमा, ८ जना तराई अस्पतालमा र बाँकी अन्य अस्पतालमा उपचाररत छन्।

संघ, प्रदेश र स्थानीय सरकारले संयुक्त रूपमा नियन्त्रण अभियान अघि बढाइरहेका भए पनि दैनिक नयाँ बिरामी थपिनु र गम्भीर अवस्थाका केस बढ्नु स्वास्थ्यकर्मीका लागि ठूलो चुनौती बनेको छ।

स्वास्थ्य विज्ञहरूले जनतालाई सरसफाइमा ध्यान दिन, उमालेको वा फिल्टर गरिएको पानी मात्र पिउन र लक्षण देखिए तुरुन्त स्वास्थ्य संस्थामा सम्पर्क गर्न आग्रह गरेका छन्।