वीरगञ्ज। वीरगञ्जमा हैजा र झाडापखालाका बिरामी अस्पतालबाट निको भएर फर्किने क्रम तीव्र भए पनि नयाँ संक्रमित थपिँदै जाने क्रम रोकिएको छैन।

जिल्ला जनस्वास्थ्य कार्यालय पर्साले सार्वजनिक गरेको तथ्यांकअनुसार हालसम्म ३९१ जना बिरामी विभिन्न अस्पतालमा भर्ना भएका थिए। तीमध्ये १७१ जना उपचारपछि डिस्चार्ज भइसकेका छन् भने २२० जना अझै उपचाररत छन्।

सबैभन्दा बढी बिरामी नारायणी अस्पतालमा १०६ जना रहेका छन्। त्यस्तै तराई अस्पतालमा ३३, नेसनल मेडिकल कलेजमा ३१, वीरगञ्ज हेल्थ केयर हस्पिटलमा २०, सर्वोत्तम हस्पिटलमा ९, एडभान्स हस्पिटलमा ६, प्रभु हस्पिटलमा ५, नीलकण्ठ हस्पिटलमा ३, नारायणी सेन्टर हस्पिटलमा २ तथा आशाराम, वीरगञ्ज न्यूरो, स्पर्श एमएस, भवानी र अलि अर्थ हस्पिटलमा १÷१ जना उपचाररत छन्।

हिजो दिउँसो ४ बजेदेखि आज बिहान ११ बजेसम्मको अवधिमा मात्र ९५ जनामा हैजाको संक्रमण पुष्टि भएको छ।
नयाँ संक्रमितमध्ये नारायणी अस्पताल र तराई अस्पतालमा ३२/३२ जना, नेसनल मेडिकल कलेजमा १३ जना, भवानी अस्पताल, वीरगञ्ज हेल्थ केयर र मंगलम प्याथोलोजीमा ३-३ जना, अलि अर्थो अस्पताल र एडभान्स मेडिकेयर हस्पिटलमा २-२ जना रहेका छन्। अन्य केही अस्पतालहरूमा पनि एक-एक जनामा संक्रमण पुष्टि भएको जिल्ला जनस्वास्थ्य कार्यालयले जनाएको छ।

हालसम्म २४ जना बिरामीलाई आईसीयूमा र ६ जनालाई एचडीसीयूमा राखेर उपचार भइरहेको छ। तीमध्ये वीरगञ्ज हेल्थ केयर हस्पिटलमा ९ र तराई हस्पिटलमा ८ जना आईसीयूमा छन्।

स्वास्थ्य अधिकारीहरूले हाल देखिएको तथ्यांकले हैजाको संक्रमण अझै नियन्त्रणमा आउन नसकेको प्रष्ट पार्छ। डिस्चार्ज हुनेहरूको संख्या बढ्नु सकारात्मक संकेत भए पनि लगातार नयाँ संक्रमण देखिनु र आईसीयूमा बिरामी संख्या बढ्नु चुनौतीपूर्ण बनेको छ।