वीरगञ्ज । समाजवादी प्रेस संगठन नेपाल पर्साले आफ्नो चौथो स्थापना दिवसको अवसरमा आज बिहान वीरगञ्जमा प्रभातफेरी र कोणसभा आयोजना गरेको छ। घण्टाघरबाट सुरु भएको प्रभातफेरी माईस्थान, महावीरस्थान, आदर्शनगर, घडिअर्वा हुँदै नगर परिक्रमा गरेर पुनः घण्टाघरमै पुगेर कोणसभामा परिणत भएको थियो।

कोणसभामा संगठनका पर्सा जिल्ला अध्यक्ष शम्भु कुमार सुमनले अध्यक्षता गर्नुभएको थियो। कार्यक्रममा सम्बोधन गर्दै नेकपा एकीकृत समाजवादी पार्टी पर्साका अध्यक्ष बालगोपाल थापाले पत्रकारहरू सधैं लोकतान्त्रिक मूल्य र पार्टीसँगै रहेकाले प्रेस स्वतन्त्रताको पक्षमा आफ्नो पार्टी स्पष्ट रहेको बताउनुभयो। उहाँले सरकारले ल्याएका मिडिया–विरोधी विधेयक तत्काल संशोधन गर्नुपर्नेमा जोड दिनुभयो।

नेपाल पत्रकार महासंघका केन्द्रीय सचिव अशोक तिवारीले पछिल्लो समय पत्रकारितामा असुरक्षा बढ्दै गएको गम्भीर चिन्ता व्यक्त गर्नुभयो। उहाँले अभिव्यक्ति स्वतन्त्रतामाथि सरकारले चालेका कदमलाई कडा शब्दमा आलोचना गर्दै ल्याउन लागिएको प्रेसविरोधी विधेयक अस्वीकार्य हुने प्रष्ट पार्नुभयो। साथै मिडिया–मैत्री राज्य निर्माणका लागि पत्रकारहरूको एकता अपरिहार्य रहेको उल्लेख गर्नुभयो।

वक्ताहरूले मिडियाको दर्ता र नविकरण प्रशासन मातहतमा राख्ने प्रावधानप्रति आपत्ति जनाउँदै, सूचना विभागको कार्य अवरुद्ध हुनु र प्रशासनबाट आवश्यक सहयोग नपाउँदा पत्रकारहरू समस्यामा परेको धारणा राखेका थिए।

यस अवसरमा नेपाल पत्रकार महासंघका केन्द्रीय लेखा समिति संयोजक केसी लामिछाने, मधेश प्रदेश अध्यक्ष श्याम बन्जारा, समाजवादी प्रेस संगठन नेपालका केन्द्रीय सचिव बृजलाल पासवान, मधेश प्रदेश अध्यक्ष मनोज पटेल, नेपाल पत्रकार महासंघ पर्साका कोषाध्यक्ष सञ्जिव मिश्र, रेडियो वीरगञ्ज, मधेश दृष्टि र टिभी वीरगञ्जका कार्यकारी अध्यक्ष ध्रुव साह, प्रेस सेन्टर पर्साका अध्यक्ष शिवनाथ यादव, श्रमजीवी पत्रकार संघ पर्साका अध्यक्ष आरके पटेललगायतले शुभकामना मन्तव्य व्यक्त गरेका थिए।

स्थापना दिवसमा आयोजित कार्यक्रममा पत्रकारिता क्षेत्रमा बढ्दो चुनौती, अवसर र प्रेस स्वतन्त्रताको संरक्षणमा सबलीकरण आवश्यक रहेको सन्देश प्रवाह गरिएको आयोजकहरूले बताएका छन्।