प्रकाश तिवारी, वीरगञ्ज ।
वीरगञ्जमा हैजाको संक्रमण पुष्टि भएपछि खानेपानी परीक्षण र शुद्धीकरणसँगै जनचेतनामूलक अभियान पनि सुरु गरिएको छ । खानेपानी तथा ढल व्यवस्थापन विभागका अनुसार प्रभावित क्षेत्रमा घुम्ती सवारीसाधनसहितको प्राविधिक टोली परिचालन गरी पानी परीक्षण र क्लोरिन प्रयोगमार्फत शुद्धीकरण कार्य भइरहेको छ ।

विभागका महानिर्देशक रामकुमार श्रेष्ठले हैजा पुष्टि भएका क्षेत्रमा आवश्यक सामग्रीसहित टोली खटाइएको जानकारी दिए । उनले भने,
“हामीले तत्कालै घुम्ती टोली पठाएर पानी परीक्षण र शुद्धीकरण सुरु गरेका छौँ । थप सामग्री र उपकरण पनि पठाइँदैछ, ताकि संक्रमण फैलिन नदिइयोस् ।”

गत शुक्रबार वीरगञ्जमा तीन जनामा हैजा रोगको संक्रमण पुष्टि भएपछि स्थानीय बासिन्दा त्रसित भएका छन् । संक्रमण नियन्त्रणका लागि महानगरपालिकाले खानेपानी परीक्षणसँगै सरसफाइ अभियान थालेको छ । विद्यालय, टोल विकास संस्था र महिला समूहहरूलाई समेत सचेतनामूलक अभियानमा संलग्न गराइएको छ ।

स्वास्थ्यकर्मीहरूले हैजा संक्रमणबाट बच्न निम्न सावधानी अपनाउन आग्रह गरेका छन् :

• उमालेको वा फिल्टर गरिएको पानी मात्र पिउनुहोस् ।

• खुला ठाउँमा थुप्रिएको फोहर तत्काल व्यवस्थापन गर्नुहोस् ।

• खानेकुरा राम्ररी पकाएर मात्र सेवन गर्नुहोस् ।

• साबुनपानीले पटक–पटक हात धुनुहोस् ।

• रोगी भेटिएमा तुरुन्त नजिकैको स्वास्थ्य संस्थामा जानुहोस् ।

जनचेतनामूलक अभियानअन्तर्गत सामुदायिक स्वास्थ्य स्वयंसेवक र नगर प्रहरीमार्फत  प्रचार–प्रसार भइरहेको छ ।

स्वास्थ्य निकायले हैजाको संक्रमण फैलिन नदिन सामूहिक प्रयास आवश्यक रहेको भन्दै सरसफाइलाई दैनिक जीवनशैलीको हिस्सा बनाउन वीरगञ्जबासीलाई आह्वान गरेको छ ।