काठमाडौं । २०६७ सालमा ओखलढूंगाका एक एमाले नेताको हत्या गरी फरार माओवादीका नेताले आत्महत्या गरेका छन् । ओखलढुंगाको एक होटलमा एमाले नेता छविलाल कार्कीको हत्या गरेर फरार माओवादीका नेता बाबुराम सुवेदीले आत्महत्या गरेका हुन् ।

त्यतिबेला अनुसन्धानको क्रममा प्रहरीले सुवेदीलाई मुख्य आरोपीको रूपमा खोजी गर्न लागेपछि उनी फरार भएका थिए । त्यतिबेला उनी माओवादी पार्टीको जिल्ला कमिटी सदस्य र २ नं इलाका कमिटीका इन्चार्ज थिए । सुवेदीसँग हत्यामा संलग्न भएका अरू धेरै पक्राउ परे, कतिपय सजाय भोगेर जेलबाट निस्किसक्दासम्म सुवेदी भने फरार थिए ।

सुवेदीले आइतबार सुर्खेतमा आत्महत्या गरेका हुन् । सुवेदीले वीरेन्द्रनगर बसपार्कमा रहेको एक होटलमा आत्महत्या गरेको प्रहरीले जनाएको छ । घटनास्थलबाट सुसाइड नोट मानिएको एक कागज पनि भेटिएको र यसमा माओवादीको नेतृत्व र अध्यक्ष प्रचण्डका कारण आफूले आत्महत्या गर्नुपरेको लेखिएको प्रहरी बताउँछ । यसमा उनले माओवादीको नेतृत्वको चर्को आलोचना गरेका छन् ।

छविलाल हत्याकाण्डमा माओवादीले पार्टीको आधिकारिक संलग्नता अस्वीकार गरेको थियो । तर पक्राउ परेका अभियुक्तहरूले भने बयानमा पार्टीका अध्यक्ष र शीर्ष नेताहरू प्रचण्ड, रामबहादुर थापा र गोपाल किरातीको आदेशमा हत्या गरेको बयान दिएका थिए । साभार ः डिसि नेपाल