वीरगंज । नेपाल इञ्जिनियर्स एसोसिएसन वीरगंज केन्द्रको हालै सम्पन्न निर्वाचनबाट निर्वाचित पदाधिकारीलाई वीरगंज महानगरपालिकाले आज औपचारिक रूपमा सम्मान गरेको छ ।

महानगर प्रमुख राजेशमान सिंहले मंगलबार आफ्नो कार्यकक्षमा आयोजित कार्यक्रममा अध्यक्ष प्रियान्सु कुमार गुप्ता, उपाध्यक्ष श्याम किशोर दास, सचिव मनिष केशरीसहित कार्यसमितिका अन्य नवनिर्वाचित इञ्जिनियरहरूलाई सम्मान गर्दै सफल कार्यकालका लागि शुभकामना व्यक्त गरे ।

कार्यक्रमलाई सम्बोधन गर्दै प्रमुख सिंहले इञ्जिनियरहरूको दक्षता, इमान्दारिता र योजनाबद्ध कार्य देशको विकासका लागि अपरिहार्य भएको बताउँदै नयाँ नेतृत्वले अझ सक्रिय भूमिका निर्वाह गर्ने विश्वास व्यक्त गरे । उनले भने, “इञ्जिनियरहरू विकासको मेरुदण्ड हुन् । तपाईँहरूको इमानदार प्रयास र योजनाबद्ध कामले मात्र शहर र देशको रूपान्तरण सम्भव हुन्छ। महानगर यसमा सधैं सहकार्यका लागि तयार छ ।”

त्यस्तै, प्रमुख प्रशासकीय अधिकृत अरविन्दलाल कर्णले पनि नवनिर्वाचित समितिलाई बधाई ज्ञापन गर्दै व्यावसायिक मर्यादा कायम राख्दै महानगरसँग सहकार्यमा काम गर्न आग्रह गरे । उनले नयाँ नेतृत्वले इञ्जिनियरहरूको हकहितसँगै समाज विकासमा पनि ठोस योगदान पु¥याउने अपेक्षा व्यक्त गरे ।

नवनिर्वाचित अध्यक्ष प्रियान्सु कुमार गुप्ताले महानगरले देखाएको सद्भाव र सम्मानप्रति आभार प्रकट गर्दै युवा इञ्जिनियरहरूको क्षमता विकास, तालिम र प्राविधिक क्षेत्रमा नवीनता ल्याउन आफू प्रतिबद्ध रहेको बताए । उनले पेशागत मर्यादा कायम राख्दै संस्थालाई अझ सशक्त बनाउन सबैको साथ र सहकार्य आवश्यक रहेको पनि उल्लेख गरे ।

त्यस्तै, उपाध्यक्ष श्याम किशोर दास र सचिव मनिष केशरीले आफ्नो कार्यकालमा संस्थालाई सबल बनाउन, सदस्यहरूबीच एकता कायम राख्न र प्राविधिक क्षेत्रमा नयाँपन ल्याउन प्राथमिकता दिने बताए ।

कार्यक्रममा सहभागी अन्य इञ्जिनियरहरूले पनि महानगरसँग सहकार्य गरेर वीरगंजलाई आधुनिक, व्यवस्थित र प्रविधिमैत्री शहर बनाउने प्रतिबद्धता व्यक्त गरेका छन् ।