वीरगञ्ज । दिवंगत फोटो पत्रकार स्व. सुबोध सिंहको स्मृतिमा स्थापना गरिएको “स्व. सुबोध स्मृति पत्रकारिता पुरस्कार” यस वर्ष वीरगञ्जका पत्रकार क्रान्ति साहलाई प्रदान गरिएको छ। प्रतीक प्रकाशन समूहले अन्नपूर्ण पोस्टका पर्सा संवाददाता तथा मधेस खबर अनलाइनका संस्थापक–सञ्चालक साहलाई नगद ५१ हजार रुपैयाँसहित सम्मान गरेको हो।

प्रतीक दैनिकको ३९औं वार्षिकोत्सवको अवसरमा आयोजित विशेष समारोहमा वीरगञ्ज महानगरपालिकाका मेयर राजेशमान सिंहले प्रमाणपत्रसहित नगद राशी प्रदान गर्दै साहलाई सम्मानित गरेका थिए। सो अवसरमा कार्यक्रम प्रतीक प्रकाशन समूहकी अध्यक्ष बिन्दु शर्माको अध्यक्षता तथा प्रमुख अतिथि मेयर सिंहको आतिथ्यतामा सम्पन्न भएको हो।

करीब दुई दशकदेखि पत्रकारितामा सक्रिय साहलाई सत्य, निडरतापूर्ण पत्रकारिता र सामाजिक उत्तरदायित्वमा देखाएको योगदानको कदरस्वरूप यो सम्मान प्रदान गरिएको आयोजकहरूले जनाएका छन्। विशेषगरी स्तम्भकारका रूपमा साहले उठाएका चेतनामूलक र गम्भीर विषयहरूले समाजमा बहसको वातावरण निर्माण गर्न योगदान पुर्याएको भन्दै उनको प्रशंसा गरिएको थियो।

कार्यक्रममा अन्य पत्रकार तथा सञ्चारकर्मीहरूलाई पनि विभिन्न सम्मान प्रदान गरिएको थियो। प्रतीक दैनिकका उत्कृष्ट संवाददाता प्रमोद यादवलाई नगद १५ हजार रुपैयाँसहित सम्मान गरिएको छ।

त्यसैगरी नेपाल पत्रकार महासंघ पर्साका अध्यक्ष ओमप्रकाश खनाललाई उत्कृष्ट स्तम्भकारको रूपमा नगद १० हजार रुपैयाँसहित सम्मान गरिएको छ भने स्व. चीरञ्जीवी कोइराला स्मृति पत्रकारिता पुरस्कारबाट पत्रकार सूर्यनारायण विकलाई नगद १५ हजार रुपैयाँसहित सम्मानित गरिएको हो। प्रतीक दैनिकका कर्मचारी श्यामजी प्रसाद गुप्ताले नगद ५ हजार रुपैयाँ प्राप्त गरे भने स्तम्भकार अनन्तलाल दासलाई दोसल्ला ओढाएर सम्मान गरिएको थियो।

कार्यक्रममा स्व. सुबोध सिंहका दाजु सुदर्शन सिंह, मधेस विश्वविद्यालयका उपकुलपति प्रा. डा. दीपक शाक्य, पर्साका प्रमुख जिल्ला अधिकारी गणेश अर्याल, प्रहरी उपरीक्षक गौतम मिश्र, वीरगञ्ज उद्योग वाणिज्य संघका अध्यक्ष हरि गौतम, पर्सा बार एशोसिएसनका अध्यक्ष रामनारायण कुर्मी, पत्रकार राजेन्द्र कोइराला, श्याम पोख्रेललगायत विशिष्ट व्यक्तिहरूको उल्लेखनीय उपस्थिति रहेको थियो।