बीरगञ्ज । जिल्ला प्रहरी कार्यालय धनुषाले प्रहरी वरिष्ठ नायब निरीक्षक सागर सम्शेर जबरालाई असार महिनाको ‘पुलिस अफ दि मन्थ’ घोषणा गरेको छ।

धनुषा प्रहरीको अपराध नियन्त्रण तथा अनुसन्धान शाखामा कार्यरत जबराले पछिल्लो समय गम्भीर प्रकृतिका आपराधिक घटनाहरूको सफल अनुसन्धानमा उल्लेखनीय भूमिका निर्वाह गर्दै प्रहरी संगठनको छवि उच्च बनाउन योगदान गरेका थिए।

धनुषा प्रहरी प्रमुख प्रहरी उपरीक्षक नरहरि रेग्मीका अनुसार, जबराले हत्या, आक्रमण, ठगी, विश्वासघात तथा विद्युतीय अपराधजस्ता मुद्दामा फरार अभियुक्तहरूलाई पक्राऊ गर्न महत्वपूर्ण सफलता हासिल गरेका छन्।

प्रहरीका अनुसार, गत वर्ष चैत १७ गते लक्ष्मिनिया गाउँपालिका–५ बनिनियाँमा श्रीमती अञ्जली यादवको हत्या गरी शव गाडेको आरोपमा फरार रहेका हरिराम यादवलाई पक्राउ गर्न जबराले निर्णायक भूमिका खेलेका थिए।

त्यसैगरी, असार १८ गते जनकपुर उपमहानगरपालिका–१५ मा वासुदेव साहमाथि चक्कु प्रहार गरी फरार रहेका अभियुक्त बेचन महासेठलाई खजुरी रेलवे स्टेशनबाट पक्राउ गर्न पनि जबराको सक्रियता प्रशंसनीय रह्यो।

त्यसैगरी, ठगी तथा विद्युतीय अपराधमा फरार रहेका हनिफ नदाफलाई पक्राऊ गरी अनुसन्धान अघि बढाउन पनि उनले सक्रिय भूमिका खेलेका थिए।

एसपी रेग्मीका अनुसार, “सागर सम्शेर जबराले पाएको जिम्मेवारीलाई उच्च व्यावसायिकता र निष्ठाका साथ पूरा गर्दै प्रहरी संगठनको छविमा सकारात्मक प्रभाव पारेका छन्।”

उनको कार्यले प्रहरीप्रतिको आमनागरिकको विश्वास बढाउनुका साथै संगठनको गौरवलाई अझ मजबुत बनाएको भन्दै उनलाई असार महिनाको उत्कृष्ट प्रहरी घोषणा गरिएको धनुषा प्रहरीले जनाएको छ।