वीरगन्ज– यातायात व्यवस्था कार्यालय वीरगन्जले सवारी चालक अनुमति पत्रका लागि लिने लिखित र प्रयोगात्मक परीक्षा अनिश्चितकालका लागि स्थगन गरेको छ । मधेश प्रदेश सरकारको श्रम तथा यातायात मन्त्रालय जनकपुरधामले बुधबार पत्राचार गरि लिखित तथा प्रयोगात्मक परीक्षा स्थगन गर्न आदेश दिएको थियो । 

यातायात व्यवस्था कार्यालय वीरगन्जका प्रमुख कमलराज गौतमले भदौ १६ देखि लिईने लिखित र ट्रायल(प्रयोगात्मक) परीक्षा स्थगित गरिएको बताए । शुक्रबार गौतमले सूचना प्रकाशित गर्दै श्रम तथा यातायात मन्त्रालयको अनुमती विना कुनै वर्गको लिखित र प्रयोगात्मक परीक्षा सञ्चालन नगर्न/नगराउन आदेश आएकाले भदौ १४ पछि सञ्चालन हुने सम्पूर्ण लिखित तथा प्रयोगात्मक परीक्षाहरु अर्को आदेश प्राप्त नभएसम्मको लागि स्थगित गरिएको जनाएका छन् । 

प्रदेश सरकारको श्रम तथा यातायात मन्त्रालयका शाखा अधिकृत सुनिल कुमार शाहले गत बुधवार पठाएको पत्रमा भदौ १३ र १४ मा लिईने लिखित परीक्षा र प्रयोगात्मक परीक्षा पश्चात यस मन्त्रालयको अनुमती विना कुनै वर्गको लिखित र प्रयोगात्मक परीक्षा सञ्चालन नगर्न/नगराउन उल्लेख छ । शाहका अनुसार अख्तियार दुरुपयोग अनुसन्धान विभागले मन्त्रालयमा पत्राचार गरेपछि लिखित तथा प्रयोगात्मक परीक्षा बन्द गराउन आदेश गरिएको हो । 

‘प्रयोगात्मक परीक्षा (ट्रायल)को छानबिन गर्नुपर्ने भएकाले पत्र पठाएका हौ ,’शाहले भने, ‘ट्रायल छानबिनको क्रममा रहेकाले बन्द गर्न आदेश दिइएको हो । ‘प्रयोगात्मक परीक्षा (ट्रायल)को छानबिन गर्नुपर्ने भएकाले पत्र पठाएका हौ ,’ पुराना कर्मचारीका अनुसार यसअघि थुप्रै पटक उजुरी परे । तर, उजुरीकै आधारमा लिखित र ट्रायल परीक्षा स्थगित गरिएको यो पहिलो पटक हो । 

पर्साको वीरगन्ज सहित अहिले मधेश प्रदेशको आठवटै जिल्लामा यातायात व्यवस्था कार्यालय स्थापना भएका छन् । सबै कार्यालयले सवारी चालक अनुमति पत्रको लिखित र प्रयोगात्मक परीक्ष लिने र उत्तीर्ण भएकालाई लाईसेन्स वितरण गर्ने गरेका छन् । श्रम तथा यातायात मन्त्रालयले भने वीरगन्ज यातायातको मात्र लिखित र ट्रायल परीक्षा स्थगीत गर्ने आदेश गरेको छ ।