वीरगन्ज–स्वास्थ्य तथा जनसङ्ख्या मन्त्री प्रदीप यादवले ललितपुरस्थित स्टार हस्पिटलमा स्थापित रक्त सञ्चार सेवा केन्द्रको उद्घाटन गर्नुभएको छ ।

शुक्रवार अस्पतालमा आयोजित एक विशेष समारोहका बिच मन्त्री यादवले रक्त सञ्चार सेवा केन्द्रको उद्घाटनसँगै अस्पतालले प्रकाशित गर्न थालेको नयाँ समाचार पत्रिकाको पनि विमोचन गर्नुभएको हो ।

समारोहमा प्रमुख अतिथिका रूपमा सहभागी मन्त्री यादवले निजी अस्पतालमा रक्त सञ्चार केन्द्रको स्थापना गरेर स्टार हस्पिटलले एउटा नमुना काम गरेको बताउनुभयो । उहाँले भन्नुभयो, “रक्त सञ्चार केन्द्रको स्थापनाले अस्पतालमा उपचाररत बिरामीहरूलाई मात्र नभई, टाढाबाट आउने अन्य बिरामीहरूलाई पनि सहज हुनेछ । यो केन्द्रले उपचार प्रक्रिया सरल र छिटो बनाउन मद्दत पुर्या्उनेछ ।”

मन्त्री यादवले रक्त सञ्चार केन्द्रको महत्त्वलाई जोड दिँदै भन्नुभयो, “यो केन्द्रले अस्पतालको गुणस्तरमा उल्लेखनीय वृद्धि गर्नेछ । अब बिरामीहरूले रगत प्राप्त गर्न अन्यत्र जानुपर्ने बाध्यता अन्त्य हुनेछ । यसले स्वास्थ्य सेवाको पहुँचलाई अझ प्रभावकारी बनाउनेछ ।”

त्यस्तै रक्तदानको महत्त्वबारे चर्चा गर्नुहुँदै मन्त्री यादवले भन्नुभयो, “रक्तदान जीवनदान हो । एक युनिट रगतले तीन जनासम्मको जीवन बचाउन सकिन्छ । नेपालमा रक्तदानको अवस्था सुधार्न जनचेतना कार्यक्रमहरू सञ्चालन गर्नु आवश्यक छ । रक्तदानको महत्त्वबारे नागरिकहरूलाई जानकारी गराउन सकिन्छ भने रक्तदाताहरूको सङ्ख्या बढाउन सकिन्छ ।”

नेपालमा रक्तदानको स्थिति अहिले पनि चुनौतीपूर्ण रहेको बताउँदै उहाँले थप्नुभयो, “देशभरका अस्पतालहरूमा रगतको अभावले गर्दा बिरामीहरूलाई उपचारमा समस्या हुने गर्दछ । रक्तदानका लागि नियमित रक्तदान शिविरहरू आयोजना गर्नु, सामाजिक सञ्जाल र मिडियाको माध्यमबाट जनचेतना फैलाउनु, र विद्यालय तथा कलेजहरूमा रक्तदान सम्बन्धी कार्यक्रमहरू सञ्चालन गर्नु आवश्यक छ ।”

समारोहमा उपस्थित अन्य वक्ताहरूले पनि रक्त सञ्चार केन्द्रको स्थापनाले स्वास्थ्य सेवा क्षेत्रमा ल्याउने सकारात्मक प्रभावहरूबारे चर्चा गर्नुभएको थियो । साथै, नेपालमा रक्तदाताहरूको सङ्ख्या वृद्धि गर्न सकिने विभिन्न उपायहरूबारे सुझावहरू प्रस्तुत गर्नुभएको थियो ।