काठमाडौँ । पर्साको वीरगन्जस्थित नबिल बैंकबाट १७ वैशाखमा राति एउटा समूहले चोरी गर्‍यो । ग्यास वेल्डिङ गर्ने मेशिनले टिनको बाकस र दराज काटेर आरोपीहरूले बाइपास रोडस्थित नबिल बैंकको शाखाबाट १ करोड ३४ लाख चोरी गरेका हुन् । चोरेपछि उनीहरू बोरामा रकम लिएर भागेको सीसीटिभी फुटेजमा देखिन्छ ।

चोरीमा संलग्न ४ जनालाई भारतीय प्रहरीले पक्राउ गरेको छ । भारतमा पक्राउ पर्नेमा विहार घर भएका मन्टु कुमार, अर्जुन पासवान, यार जी भनेर चिनिने राज कुमार र भुलन महतो छन् ।

२०८० साउनदेखि चैतसम्ममा १४ वटा डाँकाचोरीको घटना भएका छन् । धनुषामा ८० लाख लुटपाट र पर्साको नबिल बैंक चोरी भएको घटना पछिल्लो समयको सबैभन्दा ठुला घटना मानिएको अनुसन्धानमा संलग्न अधिकृतहरू बताउँछन् । सबैभन्दा धेरै डाँकाचोरी बरामा हुने तथ्याङ्कबाट देखिन्छ । २०७९–०८० मा तराईमा २६ वटा डाँकाचोरीका घटना भएका थिए । २०८० साउनयता ९ महिनामा १४ वटा डाँकाचोरी भएका छन् ।

• ३ वर्षमा १७ सय १९ ठाउँमा चोरी

पछिल्लो ३ आर्थिक वर्षमा तराईमा १ हजार ७१९ वटा चोरीका घटना भएका छन् । आर्थिक वर्ष २०७८–०७९ मा ६४७ वटा चोरीका घटना भएका छन् । २०७९–०८०मा ६७८ र चालु आर्थिक वर्षमा ३९४ वटा चोरीका घटना भएको मधेस प्रदेश प्रहरी कार्यालयका एसपी सुवास चन्द्र बोहराले रातोपाटीलाई बताए ।

धनुषामा सहकारी संस्थाका कर्मचारी वीरेन्द्र महतोलाई ३ जना पेस्तोलधारीले लुटेको प्रहरीको प्रारम्भिक अनुसन्धान निष्कर्ष छ । जिल्ला प्रहरी कार्यालय धनुषाका डीएसपी रञ्जन अवा भन्छन्, ‘पीडितले पेस्तोल देखाएर लुटेको जाहेरी दिनुभएको छ ।’