मन्दिरको गर्भगृह अगाडि रहेको दर्शनगर्ने स्थलमा सुनको गरगहना लुटिए (स्नेचिंग)पछि श्रद्धालुहरुमा नकारात्मक सन्देश जान थालेको छ । पछिल्लो पटक गत मंगलवार बिहान साढे ८ बजे आरती पूजा भइरहेको बेला दुईजना श्रद्धालु महिलाको घाँटीबाट सुनको सिक्री चोरिएको थियो । भारतको बैंगलुरुबाट जानकी मन्दिर दर्शन गर्न आएको ५४ जनाको समूहमा रहेका महिलाहरु मध्ये एकजनाको घाँटीबाट ७० ग्रामको सुनको सिक्री र अर्को महिलाको घाँटीबाट ४० ग्रामको सुनको सिक्री चोरिएको श्रद्धालुहरुले जनाएका छन् ।

मन्दिरको मुख्यद्वारसँगै रहेको तल्लो भागको कोठामा पर्यटक प्रहरी राखिएको छ । त्यो कोठादेखि १५ मिटरको दूरी भित्र नै स्नेचिंग हुने गरेको छ । तर प्रहरीले आज सम्म स्नेचिंगगर्नेको पहिचान समेत गर्न सकेको छैन् । प्रहरीको भूमिकामाथि कतिपयले प्रश्न उठाउन थालेका छन् ।

जिल्ला प्रहरी कार्यालय धनुषाका प्रमुख एसपी महेश्वर तिवारीले सुनको सिक्री चोरी गर्नेलाई चाँडै पक्राउ गरी चोरीएको गहना बरामद गर्ने दावी गरेका छन् । तर हप्ता दिन बित्न लाग्दा पनि उपलब्धि हुन सकेको छैन् । पछिल्लो केही महिनादेखि जनकपुरधाममा आन्तरिक र भारतीय धार्मिक पर्यटकहरुको संख्या निकै बढेको छ । भारतको अयोध्यामा भगवान रामललाको मन्दिरमा प्राणप्रतिष्ठा भएदेखि नै जनकपुरधाममा जगतजननी जानकी मन्दिरको दर्शनगर्ने दर्शनार्थीहरुको संख्यामा निकै वृद्धि भएको छ ।

दर्शनार्थीहरुले असुरक्षा महसुस गर्न थालेपछि बढेको पर्यटकको चाप घटने चिन्ता समाजसेवी एवं औषधी व्यवसायी तेजनारायण चौधरीले व्यक्त गरेका छन् । ‘जानकी मन्दिरमा दर्शनका लागि श्रद्धालुहरुलाई लामबद्ध गराउन थालिएकोछ’ उनले भने, यो सकारात्मक रहेकाले निरन्तरता दिनुपर्छ । मन्दिरको परिसर फराकिलो भएकाले भित्री भागमा नै घुमाउरो लाम बनाउनुपर्ने उनको सुझाव छ ।

यता, जानकी मन्दिरका उत्तराधिकारी महन्थ राम रोशन दास बैष्णवले मन्दिरमा लाइन लगाएर दर्शन गराउनुपर्ने व्यवस्था राम्रो रहेको बताएका छन् । तर, फलामको रेलिङ्ग भन्दा स्टिलको रेलिङ्ग दिँदा हेर्नमा राम्रो लाग्ने उनले बताए ।