वीरगन्ज– पर्सा प्रहरीले फागुन महिनामा भन्सार राजस्व छली गरि भित्र्याइएका ३ करोड ३९ लाख बराबरको सामान बरामद गरि राजस्व अनुसन्धान कार्यालय पथलैयामा बुझाएको छ ।

जिल्ला प्रहरी कार्यालय पर्साका अनुसार एक महिना अवधिमा अवैध तरिकाले भित्र्याउन लागिएको चिनी, खाने तेल, चक्लेट, प्याज लगायतका खाद्यान्न, हार्डवेयर पार्टस, विभिन्न किसिमका लत्ताकपडा, पेयपदार्थ कोल्ड ड्रिंक्स, जुत्ता चप्पल र भाडाकुडा बरामद गरिएको हो । 

पर्सा प्रहरी प्रमुख प्रहरी उपरिक्षक कुमोध ढुंगेलका अनुसार सो अवधिमा विभिन्न मुद्दाका फरार रहेका ९३ जना प्रतिवादीहरुलाई समेत पक्राउ गरिएको छ  । सोही अवधिमा २ हजार ५८५ थान प्रतिबन्धित ट्याब्लेट, १४ केजी गांजा र २० ग्राम खैरो हिरोइन बरामद भएको छ । फागुन पहिलो साता सरुवा भई पर्साको कमाण्ड सम्हालेका एसपी ढुंगेलले अवैध कारोबारमा कडाई गरेका छन् ।