वीरगन्ज – वीरगन्ज स्थित नेपाल र भारतको सिमानामा रहेको मितेरी पुलमा बुधवारदेखि भारतीय सिमा सुरक्षा बल (एसएसबी) ले अस्थाई रुपले चेकजाच थालेको छ । यसअघि एसएसबीको टोलीले भारतीय भन्सार कटेपछि रक्सौल बजारमा चेकजाच गर्ने गरेका थिए ।

केन्द्रबाट नै भन्सार अगाडि चेकजाच गर्ने आदेश आएको एसएसबीले जनाएको छ । मितेरी पुलमा तैनाथ एसएसबीका एसआई राम प्रसादले केन्द्रको निर्देशनमा ईन्डीयन कस्टम अगाडि अस्थाई चेकपोस्ट बनाइएको बताए ।  ‘चेकपोस्ट अस्थाई हो कि स्थाई कुनै निर्देशन आएको छैन्,’ उनले भने, ‘हालको लागि चेकजाच गर्न मात्र निर्देशन आएको छ ।’

उनका अनुसार भारत भित्रिने सबैजनाको चेकजाच नगरि शंकास्पद व्यक्तिको मात्र चेकजाच गरिएको छ । गैरकानुन गतिविधी गर्नेमाथि निगरानी बढाउने उद्देश्यले ईन्डियन कस्टम अगाडि नै चेकपोस्ट राखिएको उनले बताए । खुल्ला सिमानाका कारण पछिल्लो समय तेस्रो मुलुकका नागरिक नेपाल हुदै भारत प्रवेश गर्न थालेपछि निगरानी बढाएको एसएसबीले जनाएको छ । 

पहिलो पटक मितेरी पुलमै एसएसबीले चेकजाच गर्न थालेपछि नेपाली सुरक्षाकर्मीले स्थलगत अनुगमन गरेका थिए । वीरगन्ज नाकामा रहेको सशस्त्र प्रहरी बल नेपाल सीमा सुरक्षा गुल्मका प्रमुख सशस्त्र प्रहरी नायव उपरिक्ष्ँक देवेन्द्र बहादुर सिंहले एसएसबीले चाडपर्व लक्षित सुरक्षा योजना अन्तर्गत पहिले भन्दा निगरानी बढाएको बताए ।

उनका अनुसार मितेरी पुल दुबै देशको भूमि र दुबै तर्फको दसगजामा अवस्थित रहेको छ । एसएसबीको टोली भारततर्फको दसगजा भन्दा २\३ मिटर छाडेर भारततिरै चेकजाच गरेको सशस्त्रका डिएसपी सिंहले जनाए । ‘मितेरी पुलमा सुरक्षाकर्मी चेकजाच गर्न मिल्दैन् भन्ने कुरा कुनै पनि कानुनमा उल्लेख भएको छैन्,’ डिएसपी सिंहले भने, ‘मित्रताको भावले मितेरी पुलमा बस्ने कि नबस्ने भन्ने मात्र हो ।’