वीरगन्ज – पटेर्वासुगौली गाउँपालिका कार्यालयले सङ्घीय शिक्षा ऐन विपरित विद्यालयहरूको घटुवा र शिक्षकहरूको सरुवा गरेको छ । पटेर्वासुगौली गापा–५ मौरटोल स्थित जयदुर्गे आधारभूत विद्यालय, वडा नं २ चापी स्थित अरुणोदय–कोपिला आधारभूत विद्यालय र नेपाल राष्ट्रिय आधारभूत विद्यालय विश्रामपुर गरी तीनवटा विद्यालयलाई घटुवा गरेर बालविकास केन्द्र सञ्चालन गरेको छ ।

गापा शिक्षा समितिको २०७९÷१२÷२७ गतेको निर्णय र गापा कार्यापालिकाले २०८०÷१÷१६ गते निर्णय गरे अनुसार वैशाख २१ गतेदेखि तीनवटा विद्यालयको घटुवा गरेर बालविकास केन्द्र सञ्चालनमा ल्याएको हो । विद्यालयहरूको घटुवा भएपछि सो क्षेत्रका बालबालिकाहरू प्रावि तहको अध्ययनका लागि अन्यत्रका विद्यालयमा जानुपर्दा समस्या भएको अभिभावकहरूले गुनासो गरेका छन् ।

सरकारले सङ्घीय शिक्षा ऐन बाझिने गरी गापालाई शिक्षा नियमावली नबनाउन निर्देशन दिएको थियो । शिक्षा ऐनमा विद्यालयको घटुवा, बढुवाका लागि गापाको सिफारिशमा शिक्षा विकास तथा समन्वय एकाइले कार्य गर्नुपर्ने उल्लेख छ । तर गापाले सो विपरीत आफैं निर्णय गरेर विद्यालयको घटुवा गरेको देखिन्छ ।

यसैगरी, सङ्घीय शिक्षा ऐनमा शिक्षकहरूको सरुवा, बढुवाको लागि पनि गापाले शिक्षा विकास तथा समन्वय एकाइमा सिफारिश गर्ने र एकाइले सरुवा, बढुवा गर्ने अधिकार छ । तर पटेर्वासुगौली गापा कार्यालयले शिक्षा ऐनविपरीत जनता आधारभूत, पथरैयाका राहत शिक्षकलाई नेपाल आधारभूत विद्यालय, पूर्व देकुलीमा दरबन्दीसहित सरुवा गरेको छ । जयदुर्गे आधारभूत विद्यालयका शिक्षक गोपाल रौनियारलाई नेराआवि रामभौरीभाठामा सरुवा गरेको छ ।

जनता आधारभूत विद्यालय, पथरैयाका शिक्षक लक्ष्मण चौधरीलाई पूर्व देकुली सरुवा गरिएको छ । यसैगरी, नेपाल आधारभूत विद्यालय, चापीकी शिक्षिका नीरमाया आलेलाई नेरा आवि गादी बेलावा आधारभूत विद्यालयमा सरुवा गरिएको छ । यसैगरी, नेपाल आधारभूत विद्यालय, कञ्चनपुर बैरिया र उत्तर सुगौलीका दुईजना राहत शिक्षकलाई वैशाख २१ गते वडा नं ३ स्थित नेपाल आधारभूत विद्यालय र वडा नं १ मा रहेको मदर्सामा सरुवा गरिएकामा उनीहरूलाई अहिलेसम्म हाजिर गराइएको छैन ।

मदर्सामा गैरमुस्लिम शिक्षक पठाएको भनेर हाजिर गराइएको छैन भने अर्को विद्यालयमा पनि प्रक्रियागत र विद्यालय व्यवस्थापन समिति गाउँ समाजको रायबेगर र प्रक्रिया त्रुटि भएकोले हाजिर नगराएको विद्यालय व्यवस्थापन समितिले जनाएको छ । विद्यालय घटुवा र शिक्षक सरुवा र प्रअ बाट समेत घटुवा गरेर सरुवाको विषयमा स्थानीय पटक पटक डेलीकेसन लिएर जादाँ कुनै सुनुवाइ नभएको स्थानीयको आरोप रहेको छ ।