वीरगन्ज– मधेस प्रदेशका पूर्व मुख्यमन्त्री लालबाबु राउतले मुख्यमन्त्री रहँदा सुविधास्वरुप पाएका सामानहरू अझै फिर्ता गरेका छैनन् । पूर्व मुख्यमन्त्री राउतले एउटा स्कार्पियो गाडी अझै फिर्ता गरेका छैनन् ।

त्यस्तै उनले लिएको ५ थान मोबाइल र एक थान ल्यापटप पनि फिर्ता नगरेको मुख्यमन्त्रीको कार्यालयले जनाएको छ । सुविधा स्वरूप उपलब्ध गराएको सवारीबाहेक अरु थप सवारी सुविधा माग गर्न नपाइने व्यवस्था भए पनि राउतले आफ्नो कार्यकालमा विभिन्न गाडी लिएका थिए । तीमध्ये एउटा गाडी अझै फिर्ता नभएको मुख्यमन्त्रीको कार्यालयले जनाएको हो ।

मुख्यमन्त्री कार्यालयका एक जना कर्मचारी भन्छन्, ‘उहाँले गाडीसहितका केही सामान अझै फिर्ता नगरेको जिन्सीको अभिलेखमा देखिन्छ ।’ ती सामान फिर्ता नभएकोबारे मुख्यमन्त्रीलाई पनि जानकारी गराइसकेको ती कर्मचारीको भनाइ छ ।