वीरगञ्ज : पर्साको विभिन्न नाकाहरुवाट दैनिक करोडौ रुपैयाँ बराबरको सामानहरुको व्यापक रुपमा तस्करी भइरहेको छ । वीरगञ्जबाट दैनिक कबाड भनेर अवैध सामान ओसार पोसार रक्सौलतर्फ भइरहेको हो । 

स्रोतका अनुसार भारतको सीमासँंग जोडिएको वीरगञ्जबाट छपकैयाका इमरान मियाँको कबाड तस्करी भइरहेको छ । मियाँले वीरगंजबाट रक्सौलतर्फ दैनिक २० देखि ३० वटा ठेलामा इन्भटरको पुरानो ब्याट्री लगायतको तस्करी गरिरहेका छन् ।  नेपाल प्रहरी र सशस्त्र प्रहरीको मिलोमतोमा मियाँले कबाडको सामानभित्र सुन चाँदी, मरिच, केराउ, छोहडा तस्करी गरिरहेको श्रोतको दाबी रहेको छ । कबाडमा पुरानो र नेपालमा चोरी भएको ब्याट्री समेत भारतको रक्सौलतर्फ दैनिक तस्करी भइरहेको छ । 

ठेलामा लोड भएका कबाडमा विभिन्न जनावरहरूको हड्डीको तस्करी मार्फत भारतको रक्सौलमा पठाउने गरेका छन् । चोरी तस्करी धन्धालाई नियन्त्रण गर्नुको सट्टा प्रहरीले उल्टै तस्करलाई संरक्षण गरी तस्करी धन्धालाई बढावा दिएको स्थानीयको पनि गुनासो छ ।

प्रहरीकै संरक्षणमा अहिले तस्कर र माफियाहरु मालामाल बन्ने र राजस्व चुहावट गरेर देशलाई हरिकंगाल बनाउने तत्वहरुमा खुसियाली पनि छाएको छ । पछिल्लो समय पर्सामा विभिन्न नाका भएर खुल्लेयाम तस्करी भईरहेको पाएको छ ।