वीरगन्ज– पर्साको विन्दवासिनी गाउँपालिकाको अध्यक्ष प्रमोद तिवारीले जनता समाजवादी पार्टी (जसपा) की उम्मेदवार डा. मधु गुप्तालाई सघाइरहेको समाचार एउटा प्रोपोगन्डा मात्र रहेको पुष्टि भएको छ । 

जसपा उम्मेदवार मधुलाई विन्दवासिनी गाउँपालिका प्रमुखले सघाइरहेको भनि आएको समाचारमा कुनै सत्यता नरहेको अध्यक्ष तिवारीले पुष्टि गरेका हुन् । आफै घरदैलोमा आउने अनि तस्बिर खिचेर आफैले प्रोपोगन्डा फैलाउने काम गरिएको छ । 

विन्दवासिनी गाउँपालिका वडा नम्बर १ गर्दौल स्थित निवासमा अध्यक्ष तिवारी बसिरहेको बेलामा डा.मधु सहयोगी सहित बुधबार विहान पुगेकी थिइन् । ‘घरमै आएपछि चौकीमा बसाएर चिया खुवाएको हुँ,’ गाउँपालिका अध्यक्ष तिवारी भन्छन्, ‘त्यही बेला मधुका सहयोगीले तस्बिर लिएर आफू निकटका पत्रकारलाई दिएछन् । मैले मधुलाई सघाएको छैन् ।’

तिवारी आवद्ध रहेको लोकतान्त्रिक समाजवादी पार्टी ५ दलीय गठबन्धनमा रहेको छ ।  चुनावको बेला आउने फेक समाचार प्रति सजग रहन उनले आग्रह गरेका छन् । पैसावाला उम्मेदवारसँग आर्थिक सहयोग लिएर उसको पक्षमा हुँदै नभएको माहौल बनाउनमा पछिल्लो समय वीरगन्जका केही अनलाइनहरु सक्रिय रहेको आम सर्वसाधारणको बझाई बन्दै गएको छ । 

त्यस्ता अनलाइनका विरुद्ध सामाजिक सञ्जाल फेसबुकमा युवाहरुले खुला रुपले विरोध जनाएका छन् । लगातार गलत सामाचार प्रकाशित गर्ने अनलाईन न्युज पोर्टल विरुद्ध अनफ्लो अभियान समेत सुरु भएको हरपतगन्जका सन्नी कुमारले बताउँछन् । ‘अहिलेको डिजिटल युगमा पैसा लिएर धेरै दिन प्रोपोगन्डाको धन्दा चल्दैन्,’ सन्नी भन्छन्, ‘जनता बेवकुफ छैनन् ।’