वीरगन्ज– जिल्ला प्रशासन कार्यालय पर्साको मुद्दा फाँटमा कार्यरत एक कर्मचारीलाई घुस सहित अख्तियार दुरुपयोग अनुसन्धान विभाग हेटौँडाको टोलीले नियन्त्रणमा लिएको छ । मुद्दा फाँटका कम्प्युटर अपरेटर सन्जय यादवलाई ५ हजार रुपैयाँ घुस सहित अख्तियारको टोलीले सोमबार अपराह्न नियन्त्रणमा लिएको हो । जग्गा फुकुवा गरिदिन घुस मागेको सेवाग्राहीको उजुरी अख्तियारमा परेपछि हेटौँडाको टोली प्रशासन कार्यालयमा आएको थियो ।
सहायक प्रमुख जिल्ला अधिकारी भीमकान्त पौडेलका अनुसार प्रहरी दिवसको कार्यक्रम सकाएर कार्यालय पुग्दा प्रहरीले यादवलाई घेरा हालेका थिए । ‘सेवाग्राहीसँग घुस लिँदा लिँदै नियन्त्रणमा लिएको अख्तियारको टोलीले जनाएको छ,’ जिल्ला प्रशासन कार्यालयका प्रवक्ता समेत रहेका पौडेलले भने, ‘हामी प्रहरी दिवसको कार्यक्रम सकेर यहाँ आउँदा प्रहरीले घेरा हालिसकेको थियो ।’ अख्तियारको टोली मुद्दा फाँटको अन्य कागजात समेत अध्ययन गरेको छ ।