वीरगञ्ज - अगामी मंसिर ४ गते हुने संसद र प्रदेश सभाको निर्वाचनमा उम्मेदवार बनेकाहरु क्याम्पेनिङ्गमा आजैदेखि व्यस्त देखिएका छन् । विशेषगरी चुनावी रणनीति तय गर्न उनीहरु दलीय तथा एकपक्षीय, दुईपक्षीय र बहुपक्षीय छलफलमा व्यस्त भएका हुन् ।

निर्वाचनमा जसरी हुन्छ, जीत हात पार्नका निम्ती उम्मेदवारहरुले जनता रिझाउने अभियान सुरु गरेका हुन् । विभिन्न दलका नेता÷कार्यकर्ता र आफ्ना समर्थकहरुको बीचमा उनले चुनावी रणनीति तय गरेको बताइएको छ । सबै पक्षको मत आफ्नो पक्षमा आकर्षित गर्ने योजनाका साथ चुनावी अभियानमा उत्रिएका हुन् ।

यसैबीच हिजो सोमवार एमाले र जसपा गठबन्धनका नेताहरुको बैठक बसेर चुनावी रणनीति बनाएका छन् । उक्त बैठकले गठबन्धन विरुद्ध बागी उम्मेदवारी दिनेहरुलाई कारवाही गर्ने र आफ्नो गठबन्धनलाई विजयी गराउन पार्टीको सबै शक्ति परिचालन गर्ने निर्णय गरेको छ ।

उता नेपाली काँग्रेस, लोसपा, माओवादी केन्द्र र समाजवादी पार्टी गठबन्धनका उम्मेदवारहरुले समेत चुनावी अभियानलाई तिव्रता दिनका निम्ती छलफलमा व्यस्त रहेको बताइन्छ ।

उता संघीय संसदको उम्मेदवारहरु प्रदिप यादव, राजकुमार गुप्ता , सुरेन्द्र कुर्मी, अजय चौरसिया, रमेश रिजाल, सुरेन्द्र चौधरी, अजय द्विवेदी, लक्षमण लाल कर्ण, जालिम मियाँ लगायतले चुनावी अभियानलाई तिव्रता दिएको छ ।