वीरगन्ज– सत्तारुढ ५ दलीय गठबन्धनलाई छाडेर जनता समाजवादी पार्टी (जसपा) ले नेकपा एमालेसँग चुनावी तालमेल गरेको छ ।

एमाले अध्यक्ष केपी शर्मा ओली र जसपाका अध्यक्ष उपेन्द्र यादवले अगामी मंसिर ४ गते हुने निर्वाचनका लागि गरिएको सिट बाँडफाँटको सहमति पत्रमा हस्ताक्षर गरेका छन् ।

पर्सामा एमाले र जसपाले बराबर सिट बाँडफाँट गरेका छन् । ४ वटा प्रतिनिधी सभा क्षेत्र र ८ वटा प्रदेश सभा क्षेत्र रहेको पर्सा जिल्लामा एमालेले निर्वाचन क्षेत्र नम्बर ३ र ४ लिएको छ भने जसपाले निर्वाचन क्षेत्र नम्बर एक र दुई आफ्नो भागमा राखेको छ । आठवटा प्रदेश सभाको सिट मध्ये ४/४ वटा भाग लगाइएको छ । 

यसैगरि प्रदेश सभा निर्वाचन क्षेत्र १(क), २(ख), ३(क) र ४ (क) एमालेले पाएको छ । क्षेत्र नम्बर १(ख), २(क), ३(ख) र ४ (ख) जसपाले पाएको सहमति पत्रमा उल्लेख छ ।

एमाले र जसपाबीच पर्सा सहित १४ वटा जिल्लामा तालमेल भएको छ । तालमेल भएका निर्वाचन क्षेत्रहरु बाहेक अन्य निर्वाचन क्षेत्रहरुमा दुबै पार्टीले उम्मेदवारी दिन सक्ने र यो सहकार्य निर्वाचन पछि पनि निरन्तर रहने सहमति गरिएको उक्त पत्रमा उल्लेख छ ।