वीरगन्ज– मधेस प्रदेश सरकारले मधेस आन्दोलन र जनयुद्धका सहिद परिवारलाई मासिक २१ हजारका दरले आर्थिक सहयोग गर्ने भएको छ । सरकारले मधेसी सहिद प्रतिष्ठानमार्फत् मासिक आर्थिक सहयोगसँगै सहीदका छोराछोरीलाई अध्ययनका लागि छात्रवृत्तिसमेत दिन लागेको हो । प्रतिष्ठानका संयोजकसमेत रहेका गृह तथा सञ्चारमन्त्री भरत साहले यही महिनादेखि नै वितरण गर्ने लक्ष्य रहेको बताए । उनका अनुसार सहिद परिवारको भरणपोषण तथा छात्रवृत्तिसम्बन्धी कार्यविधि नै बनाइएको छ ।
कार्यविधि अनुसार मधेस आन्दोलन तथा जनयुद्धमा सहिद भएकामध्ये आर्थिक अवस्था कमजोर भएका परिवारलाई पहिलो प्राथमिकतामा राखी मासिक अधिकतम २१ हजार प्रदान गरिने बताइएको छ । यस्तै, सहिदका छोराछोरीलाई सन्तानलाई कक्षा १ देखि ६ सम्म अध्ययन गर्न १६ हजार र ७ देखि १२ सम्मको अध्ययन गर्नेलाई १८ हजार वार्षिक रूपमा एकमुष्ठ छात्रवृत्ति दिइने मन्त्री साहले बताए ।