वीरगञ्ज – पर्साको कालिकामाई गाउँपालिकाको कार्यपालिका सदस्य चुन्न भएको निर्वाचनमा जनता समाजवादी पार्टी (जसपा) का ५ जना र नेपाली काँग्रेसका १ जना विजयी भएका छन् ।

कार्यपालिकाको ६ जना सदस्यका लागि सोमबार भएको निर्वाचनमा जसपाका ५ जना र नेपाली कांग्रेसका १ जना निर्वाचित भएका हुन् । महिला सदस्यमा जसपाकी अकलिया खातुन मुकेरी, चनरजोतिया दुसादिन, मालती देवी दुसादिन र ललिता देवी निर्वाचित हुदा दलित वा अल्पसंख्यक सदस्यमा जसपाकै हरिओम साह कलवार र कांग्रेसका रामराज चौरसिया निर्वाचित भएका छन् ।

दलित वा अल्पसंख्यक सदस्यमा विजयी भएका साह र कलवार दुवै जना बैशाख ३० गते भएको निर्वाचनमा वडाध्यक्षका पनि उम्मेदवार थिए । तर दुवै जना पराजित भएका थिए ।

कूल २७ जना मतदाता रहेको कालिकामाई गाउँपालिकाको कार्यपालिका सदस्यका लागि सोमबार भएको निर्वाचनमा जसपाका १३ जना, कांग्रेसका १२ जना र एमालेका दुई जनाले मतदान गरेका थिए ।

गाउँ कार्यपालिकाको निर्वाचनमा कांग्रेस र एमालेले आन्तरिक तालमेल गरेपनि ६ मध्ये ५ सदस्य जसपाका निर्वाचित भएका हुन् ।