वीरगन्ज–झूठो विवरण पेश गरेर नेपाली नागरिकता लिएको आरोपमा वीरगञ्जका एक उद्यमीलाई जिल्ला प्रहरी कार्यालय, पर्साले ११ दिनदेखि थुनामा राखेको छ । जिल्ला प्रहरी कार्यालय, पर्सामा ५ वर्षअघि परेको जाहेरीका आधारमा प्रहरीले अहिले उद्यमी निरञ्जन अग्रवाललाई पक्राउ गरेर हिरासतमा राखेको हो ।
सम्बन्धित निकायबाट फाइल झिकाएर अनुसन्धान भइरहेको जिल्ला प्रहरी कार्यालयका प्रहरी उपरीक्षक कुमुद ढुंगेलले बताए । पर्सा जिल्ला अदालतले ३र३ दिनका दरले चार पटक म्याद थपिसकेको ढुंगेलले जानकारी दिए । अग्रवालविरुद्ध २०७६ सालमा प्रहरी कार्यालयमा जाहेरी परेको उनले बताए । उद्योगी अग्रवालका कानून व्यवसायीले भने विगतमा तीन पटक पर्सा जिल्ला प्रशासन कार्यालयले अनुसन्धान गरी झुठो विवरणको प्रमाण फेला पार्न नसकेपछि मुद्दा तामेलीमा राखेको बताएका छन् । तामेलीमा राखिएको मुद्दामा नयाँ प्रमाण फेला परे मात्रै फेरि अनुसन्धान गर्न पाइनेमा प्रहरीले पुरानै विषयमा छानबिन गरिरहेको कानून व्यवसायीको भनाइ छ ।
स्थानीय नरेश ठाकुरले ५ वर्षअघि दिएको जाहेरीको फाइल खोलेर प्रहरीले पर्सा जिल्ला अदालतबाट पक्राउ आदेश लिएको हो । अग्रवालले जन्मका आधारमा २०६३ सालमा नेपाली नागरिकता लिएका थिए । उनले २०५१ सालमा आफू भारतीय भएको उल्लेख गरी सवारी चालक अनुमतिपत्र लिएको भन्दै ठाकुरले जाहेरी दिएका थिए ।
जिल्ला प्रशासन कार्यालय, पर्साले विगतमा सोही दाबीमा परेको जाहेरीमा कुनै आधार प्रमाण फेला नपरेको भन्दै मुद्दा तामेलीमा राखेको देखिन्छ । त्यतिबेला जिल्ला प्रहरी कार्यालय पर्सा, यातायात व्यवस्था कार्यालय, परराष्ट्र मन्त्रालय र भारतीय महावाणिज्य दूतावासमार्फत पत्राचार गरी अनुसन्धान गरिएको थियो । त्यसबेला अग्रवाल भारतीय भएको कुनै आधार प्रमाण फेला नपरेको भन्दै प्रशासनले तामेलीमा राखेको थियो ।
जिल्ला प्रहरी कार्यालय, पर्साका सूचना अधिकारी प्रहरी नायव उपरीक्षक दीपक भारतीले जिल्ला प्रशासनबाट भएको आदेश र अनुसन्धानका क्रममा जिल्ला प्रहरीबाट गएको पत्रबारे जानकारी नभएको बताएका छन् । ‘हामीकहाँ आएको जाहेरीको आधारमा अनुसन्धान भइरहेको छ । अदालतबाट आदेश लिएर पक्राउ गरिएको हो । अदालतबाटै म्याद थपेर हिरासतमा राखिएको छ,’ उनले भने ।
जिल्ला प्रहरी कार्यालय पर्साले मिति २०७१र७र१६ मा च। नं। ३८१२ को पत्रमार्फत अग्रवाल भारतीय भएको प्रमाण फेला नपरेको जानकारी पठाएको प्रशासनको आदेशमा उल्लेख छ ।
उद्यमी थुनामा रहेको घटनाका बारेमा वीरगञ्जका उद्यमी व्यापारीका संस्थाहरू बेखबरजस्तै छन् । अग्रवाल पक्राउ परेको करीब २ हप्तापछि वीरगञ्ज उद्योग वाणिज्य संघले घटनाबारे चासो राखेको छ । ‘हामीले पनि सञ्चारमाध्यमबाटै थाहा पायौं । डीआईजी साहब ९मधेश प्रदेश प्रहरी कार्यालयका प्रहरी नायव महानिरीक्षक यज्ञविनोद पोखरेल०लाई यसबारेमा ध्यानाकर्षण गराएका छौं,’ वीरगञ्ज उद्योग वाणिज्य संघका अध्यक्ष अनिलकुमार अग्रवालले भने । डीआईजी पोखरेल वीरगञ्ज आएको मौका पारेर शनिवार उद्यमीले भेटेका थिए । साभार- अभियान दैनिक