प्राय: नेपालीको दिनको सुरुवात चियाबाट हुन्छ । दूध चिया, कालो चिया, ग्रिन टी र अन्य धेरै प्रकारका चिया पिउने चलन छ । लामो समयदेखि चिया पिउनु फाइदाजनक हो वा हानिकारक भन्ने बहस पनि चल्दै आएको छ ।

अध्ययनहरूमा पनि मिश्रित परिणाम देखिएका छन् । केही अनुसन्धानले दूध चियाको सट्टा कालो चिया पिउनाले धेरै स्वास्थ्य लाभ हुनसक्ने सुझाव दिएको छ भने केही शोधकर्ताहरूले चियामा क्याफिन पाइने भएकाले यसको नियमित वा अत्यधिक सेवनले धेरै साइड-इफेक्ट हुने भनेका छन् ।

कतिपय मानिस दूध चिया स्वास्थ्यका लागि हानिकारक हुने विश्वास गर्छन् भने कोही ग्रिन टी पिउनाले छिटो तौल घटाउन मद्दत गर्छ भन्ने विश्वास गर्छन् । चियाको बारेमा यस्ता धेरै कुरा व्याप्त छन् ।

कालो चिया भन्दा ग्रिन टी बढी स्वास्थ्यकर हुन्छ ?

कालो चियाको तुलनामा ग्रिन टीलाई बढी फाइदाजनक मानिन्छ । तर दुवैमा रहेको एन्टी-अक्सिडेन्टले स्वास्थ्यलाई बराबर मात्रामा फाइदा पुर्‍याउँछ । त्यसो भए ग्रिन टी कुन उद्देश्यका लागि बढी खपत भइरहेको छ त्यो महत्त्वपूर्ण हुन्छ । सामान्यतया कालो चियामा क्याफिन बढी हुन्छ । यसबाहेक एकाग्रता बढाउन, शरीरलाई हाइड्रेटेड राख्न र रक्तसञ्चार बढाउनका लागि दुवै फाइदाजनक छन् ।

ग्रिन टीले तौल घट्छ

एन्टी-अक्सिडेन्टले भरिपूर्ण ग्रिन टी विशेषगरी तौल घटाउन चिनिन्छ । यसमा पाइने क्याटेचिनले मेटाबोलिजमलाई पक्कै बढाउँछ तर यसको मात्रा निकै कम हुन्छ । दैनिक ग्रिन टी पिउनाले खानपान र व्यायामसँगै विशेष ध्यान दिएमा मात्रै तौल घटाउन सकिन्छ । ग्रिन टी मात्र पिएर तौल कम हुने होइन ।

डिक्याफिनेटेड चियामा क्याफिन हुँदैन

यो सुनेर निराश हुन सकिन्छ, तर डिक्याफिनेटेड चिया क्याफिनबाट मुक्त हुँदैन । यसमा ५ देखि २० मिलिग्राम क्याफिन समावेश हुन्छ । यदि क्याफिनलाई पूर्णतया त्याग्न चाहने हो भने यसका लागि उत्तम विकल्प हर्बल चिया हो ।

टी ब्याग र चियाको पात दुवै राम्रो हो

चियाको पातबाट चिया बनाउनु भन्दा टी ब्यागबाट चिया बनाउन सजिलो हुन्छ तर यसको आफ्नै बेफाइदा पनि छ । टी ब्याग र चियाको पात दुवैले समान लाभ प्रदान गर्दैनन् । टी ब्यागमा मोटो चियाको पात राखिन्छ, जसमा एसेन्सियल आयल र सुगन्ध कम हुन्छ । तर चियाको पातबाट चिया बनाउँदा त्यसमा आवश्यक सबै कुरा समावेश हुन्छ ।

चियामा दूध मिसाउँदा यसको फाइदा कम हुन्छ

कालो चिया स्वास्थ्यका लागि फाइदाजनक छ भन्ने कुरामा कुनै शङ्का छैन । तर दूध चिया पिउनु हुँदैन यसले चियामा पाइने सबै पोषक तत्त्वहरू नष्ट गर्छ भनिन्छ । यो केवल एक मिथक हो, चियामा दूध मिसाउँदा यसको पोषक तत्त्व घट्दैन, बरु दूधले शरीरमा क्याल्सियमको आपूर्ति गर्छ । क्याल्सियमले हड्डीलाई बलियो बनाउँछ । तर दिनमा दुई कपभन्दा बढी चिया पिउनु हुँदैन ।

चियाले निर्जलीकरण निम्त्याउँछ

धेरै चिया पिउनाले बारम्बार पिसाब लाग्न सक्छ, तर यसको मतलब यो होइन कि चियाले शरीरमा डिहाइड्रेसन हुन्छ । चियाले शरीरलाई हाइड्रेटेड राख्न सक्छ, विशेषगरी चिसो मौसममा यसको सेवन गर्नुपर्छ । तर यसको सेवन सीमित मात्रामा मात्र गर्नुपर्छ भन्ने कुरामा भने ध्यान दिनुपर्छ ।

चियाको एक्सपायरी डेट हुँदैन

मानिसमा गलत धारणा छ, चियाको डेट एक्पायर कहिल्यै हुँदैन, यसको मतलब यो वर्षपछि वर्ष प्रयोग गर्न सकिन्छ । यदि यस्तै सोच्नुहुन्छ भने यो सरासर गलत हो । किनकि धेरैजसो चियाको पनि एक्सपायरी डेट हुन्छ । म्याद सकिएपछि चिया पिउनाले स्वास्थ्यमा हानि पुर्‍याउन सक्छ । यदि चियाले तिखो गन्ध आउन थाल्छ वा गन्ध गायब भयो भने चियाको म्याद सकिएको बुझ्नुपर्छ ।